«Մարիաննա», «ՍԱՍ-Գրուպ» և այլ ընկերությունների դեմ վարույթ է հարուցվել «ֆետա» բառն օգտագործելու և մոլորեցնելու համար
25.12.2023
24 ժամ ջուր չի լինի Դիլիջանի որոշ փողոցներում
27.12.2023
● Տաթև Խաչատրյան
Էկոնոմիկայի նախարարությունն առաջարկում է ստեղծել լաբորատորիաների ցանց՝ ոլորտի կարողությունները հզորացնելու, լաբորատոր գործունեության որակը բարելավելու և սննդով պայմանավորված հիվանդությունների առաջացման ռիսկերը նվազենցելու համար։
Նախագծով պետք է փոփոխություններ կատարվեն «Սննդամթերքի անվտանգության մասին» օրենքում՝ հաստատելով լաբորատորիաների ցանցի ստեղծման մեխանիզմների մշակման ծրագիրը։
Հիմնավորման մեջ նշվում է, որ սննդամթերքի անվտանգության ապահովումը հրատապ և կարևոր խնդիր է Հայաստանի համար, և այն պահանջում է ժամանակակից չափորոշիչներին համապատասխան լուծումներ։
Հայաստանի Հանրապետության սննդամթերքի անվտանգության ոլորտի կատարելագործմանն ուղղված միջոցառումների իրականացումը պայմանավորված է ոլորտի օրենսդրության կատարելագործմամբ, սննդի շղթայի բոլոր փուլերում շարունակական վերահսկողության ապահովմամբ, սննդամթերքի լիարժեք վերահսկելիությամբ, սննդամթերքի անվտանգության ոլորտի լաբորատոր կարողությունների զարգացմամբ, լաբորատոր ծառայությունների կատարելագործմամբ և արդիականացմամբ:
Նշվում է, որ լաբորատորիաների ցանցը կարևոր է՝ սննդամթերքի անվտանգության ոլորտի բարելավման և լաբորատորիաների կարողությունների գույքագրման տեսանկյունից, և նախագծի նպատակն է միավորել անասնաբուժական և այլ ոլորտների գիտական և մասնավոր լաբորատորիաները՝ ապահովելով լաբորատոր համակարգի գործունեությունը: Թե դա կոնկրետ ինչպես է կատարվելու, ինչ մեխանիզմներ են կիրառվելու, հստակ չէ։
Միայն ասվում է, որ նախագծի ընդունմամբ կխթանվի սննդամթերքի անվտանգության ոլորտի ախտորոշիչ և լաբորատոր կարողությունների հզորացումը, կբարելավվի լաբորատոր գործունեության որակը և նվազագույնի կհասցվի սննդային գործոնով պայմանավորված սպառողների հիվանդությունների առաջացման ռիսկերը:
Հիշեցնենք, որ վերջերս Էկոնոմիկայի նախարարությունը մեկ այլ նախագիծ էր ներկայացրել, որով առաջարկել է արագ արձագանքման համակարգ ներդնել սննդամթերքի անվտանգության ոլորտում` նշելով, որ սննդի միջոցով փոխանցվող հիվանդությունների թիվն աճում է և բացասական ազդեցություն ունենում մարդու օրգանիզմի վրա։
Այդ իսկ պատճառով պետք է ստեղծել արագ արձագանքման համակարգի շրջանակ՝ սննդամթերքի անվտանգության արտակարգ դեպքերին արագ և արդյունավետ արձագանքելու, սննդային գործոնով պայմանավորված սպառողների հիվանդությունների առաջացման ռիսկերը նվազագույնի հասցնելու համար:
