● Արամ Սահակյան

ԵԱՏՄ երկրներում դեղարտադրողների ստուգումները կանցկացվեն նոր սկզբունքով՝ ըստ ռիսկերի գնահատման։  Ի՞նչ է սա նշանակում,  ինչպիսի՞ նոր առաջարկներ կան փաստաթղթում և ինչպես է դա ազդելու դեղերի որակի, վերահսկման վրա։

.

.

Եվրասիական տնտեսական հանձնաժողովի կոլեգիան հաստատել է ԵԱՏՄ-ի պատշաճ արտադրական պրակտիկայի կանոնների պահանջներին համապատասխան դեղագործական տեսչությունների պլանավորման ուղեցույցը, որը հիմնված է ռիսկերի գնահատման սկզբունքի վրա։

Փաստաթուղթը ներառում է առաջարկներ՝ կապված դեղերի արտադրությամբ զբաղվող տարածքների դեղագործական տեսչությունների անցկացման հաճախականության, ծավալի և պարբերականության որոշման հետ՝ ամեն մի արտադրության համար առանձին ռիսկի գնահատման հիման վրա։

Գնահատման ընթացքում հաշվի են առնվում ինչպես տեխնոլոգիական գործընթացների առանձնահատկությունների և արտադրվող դեղերի վտանգավորության հետ կապված ներքին գործոնները, այնպես էլ՝ արտադրական պրակտիկայի կանոնների խախտումներից բխող ռիսկերը։

Նշվում է, որ այս ուղեցույցի կիրառումը ԵԱՏՄ անդամ պետությունների դեղագործական տեսչություններին հնարավորություն կտա առավել արդյունավետ պլանավորել ռեսուրսները տարեկան տեսչական ծրագրերի իրականացման համար, ինչպես նաև՝ կպահպանի Միության օրենսդրությամբ ամրագրված մոտեցումը՝ իր արդյունքների ճանաչման հարցում՝ անկախ ստուգումների հաճախականությունից։

Բացի այդ, ռիսկերի վրա հիմնված մոտեցման կիրառումը կօգնի դեղարտադրողներին օպտիմալացնել արտադրական գործընթացները, նվազեցնել ռիսկերը և ապահովել դեղերի արտադրության կայունությունն ու հուսալիությունը։

Միևնույն ժամանակ, հնարավորություն կտա կրճատել տեսչական խմբերի ընդունման հետ կապված ծախսերը։