Սննդամթերքի անվտանգության տեսչական մարմինը տեղեկացնում է, որ Երևանի կենտրոնի տեսուչները ստուգում են իրականացրել «Դան-Դեսերտ» ՍՊԸ-ին պատկանող կրեմային հրուշակեղենի արտադրամասում (ք․ Երևան, Մարտիրոսյան փ․), որի ընթացքում նմուշառում է իրականացվել բոլոր արտադրատեսակներից և հանձնվել լաբորատոր հետազոտության:

Փորձաքննության արդյունքներով՝ միայն «Տորթ արքայախնձորով» արտադրատեսակի նմուշը մանրէաբանական ՄԱՖԱնՄՔ (մեզոֆիլ աէրոբ և ֆակուլտատիվ անաէրոբ մանրէներ) ցուցանիշներով չի համապատասխանել Մաքսային Միության տեխնիկական կանոնակարգերով սահմանված պահանջներին։

ՍԱՏՄ ղեկավարի որոշմամբ՝ հրուշակեղենի արտադրամասի արտադրական գործունեության առանձին գործառույթը՝ «Տորթ արքայախնձորով» արտադրատեսակի արտադրությունը, կասեցվել է։

Հիշեցնենք, որ հունվարի 22-ին մեր «Անվտանգ սնունդ» խմբում նույնպես բողոքել էին «Dan Dessert» / «Դան Դեսերտ»-ի այս արտադրատեսակից՝ ահազանգելով, որ թարմ գնված տորթը թթված է եղել։ Ընկերությունն արձագանքել էր, ներողություն խնդրել՝ նշելով,  որ «խնդիրը հանգամանալից կուսումնասիրվի և հետևություններ կարվեն»։

ՍԱՏՄ-ից ևս հայտնել էին, որ «ահազանգին ընթացք կտրվի»։