Հունվարի 22-ին մեր «Անվտանգ սնունդ» խմբում Մարինա Եպիսկոպոսյանն ահազանգել էր, որ գնել է հունվարի 20-ի արտադրության «Dan Dessert» / «Դան Դեսերտ» ընկերության տորթ, որը թթված է եղել.

«Այսօր Մեգա մոլի Yerevan City-ից գնել եմ Դան Դեսերտի արքայախնձորով տորթ։ Թթված էր, ուտելու ոչ ենթակա։ Արտադրության ամսաթիվը 20 հունվար»,-նշել էր նա։

Ժամեր անց Մ. Եպիսկոպոսյանը հայտնել էր, որ տորթը տարել է «Երևան Սիթի»՝ վերադարձնելու, սուպերմարկետի մենեջերն էլ  «անմիջապես» համաձայնվել է, որ այն թթված է՝ «ուղղակի հոտ քաշելով».

«Գնեցի մեկ այլ տորթ, դարձյալ «Դան Դեսերտինը», քանի որ գտնում եմ, որ բաղադրությունը այնուամենայնիվ մյուս ֆիրմաների տորթերից ավելի լավ է։ Նաև որոշեցի մեկ շանս էլ տալ (գուցե ոմանք կարծեն, որ այդքան էլ խելամիտ արարք չէ): Այս անգամ ամեն ինչ լավ էր։ Բացասական տպավորություններն այնուամենայնիվ մնացին, մասնավորապես, երեխայիս արցունքները’ ծննդյան տոնի տորթը թթված հայտնաբերելով»,-նշել է Մ. Եպիսկոպոսյանը։

Մեկնաբանությունում տարբեր մարդիկ նշել էին, որ իրենց էլ է հանդիպել նույն ընկերության «բորբնոսնած», «թթված» և «հին»  տորթերից։

Իսկ Վարդի Մ-յան անունով օգտատերը նշել էր, որ մեկ տարի առաջ բորբոսնած տորթի մասին ահազանգել էր խմբում, որրից հետո մենեջերը կապ էր հաստատել իր հետ և ներողություն խնդրել (հետագայում, ցավոք, նա գրառումը ջնջել է)։

«Մեկ տարի առաջ էլ մեր գնած տորթն էր բորբոսնած, այս խմբում հրապարակում արեցի, մենեջերը ինձ հետ կապ հաստատեց, ներողություն խնդրեց, առաջարկեց փոխարենն այլ տորթ ուղարկել, ինչից, իհարկե, հրաժարվեցի: Միաժամանակ «տեղեկացրի» (վստահ եմ, որ եթե արդեն ես գիտեմ, ուրեմն ֆիրմայում հաստատ կիմանան ու կիմանան), որ առաքիչները ժամկետի պիտակը փոխում են, թեև մեր տորթի վրա ժամկետ էլ չկար նշված, խոստացավ հետևողական լինել, որ նման քայլերով իրենց տասնամյակների պատմություն ունեցող ֆիրմայի անունը չխայտառակեն: Փաստորեն ոչինչ էլ չի փոխվել»,-նշել էր նա

Մ. Եպիսկոպոսյանի բողոքին արձագանքել էին Սննդամթերքի անվտանգության տեսչական մարմնից՝ հայտնելով, որ «ահազանգին ընթացք կտրվի»։

Արձագանքել էր նաև «Դան Դեսերտ» ընկերությունը՝ ներողություն խնդրելով սպառողներից և նշելով,  որ «խնդիրը հանգամանալից կուսումնասիրվի և հետևություններ կարվեն»։

Ընկերության պատասխանն ամբողջությամբ՝ ստորև (առանց խմբագրման)

«Սիրելի սպառողներ, հայցում ենք Ձեր ներողամտությունը։ 

Ուզում ենք Ձեզ վստահեցնել որ խնդիրը հանգամանալից կուսումնասիրվի, պատճառները կբացահայտվի և համապատասխան հետևություններ ու գործողություներ կիրականացվի։ 

Պարտադիր կփորձենք կապ հաստատել գնորդի հետ՝ մանրամասն տեղեկություն ստանալու և համապատասխան լուծում տալու նպատակով»։

«ԴԱՆ-ԴԵՍԵՐՏ» ՍՊԸ ՏՆՕՐԻՆՈՒԹՅՈՒՆ