● Տաթև Խաչատրյան 

Եվրասիական տնտեսական հանձնաժողովի կոլեգիան հավանություն է տվել Մաքսային միության  029/2012-ի՝ «Սննդային հավելումների, բուրավետիչների և տեխնոլոգիական օժանդակ միջոցների» տեխնիկական կանոնակարգի ստանդարտների ցանկի փոփոխություններին։

Սննդային հավելումները որպես սննդամթերք չօգտագործվող և սննդամթերքի բաղադրամաս չհամարվող նյութեր են։ Դրանք ավելացվում են սննդամթերքին տեխնոլոգիական մշակման կամ վերամշակման ժամանակ՝ ցանկալի համազգայական, կամ այլ հատկանիշներ ստանալու համար։ 

Սննդային հավելումներ են E-տառերը պարունակող հավելումները՝ 

• սննդային ներկերը (E 100–E 199);

• կոնսերվանտները (E 200–E 299);

• հակաօքսիդանտները (E 300–E 399);

• էմուլգատորները, կայունացուցիչները (E 400–E 499):

Բուրավետիչը նույնպես հավելում է, որն ավելացվում է սննդամթերքին՝ դրա բույրն ու համը լավացնելու համար: Կարող է լինել բնական կամ արհեստական /քիմիական։

Ստանդարտների ցանկը, որի կիրառման արդյունքում կամավոր հիմունքով ապահովվում է ՄՄ ՏԿ 029/2012 պահանջների համապատասխանությունը, համալրվել է 8 ստանդարտներով (5 միջպետական ​​և Ռուսաստանի Դաշնության 3 ստանդարտներով), որոնք նախատեսում են նույնականացման բնութագրեր առանձին ​​սննդային հավելումների և ֆերմենտային պատրաստուկների համար։

53 փաստաթղթով լրացվել են փորձարկման և չափման մեթոդներն ու կանոնները, ինչպես նաև՝ նմուշառման այն կանոնները, որոնք անհրաժեշտ են ՄՄ ՏԿ 029/2012 պահանջների կիրառման, իրականացման և տեխնիկական կանոնակարգի օբյեկտների համապատասխանության գնահատման համար։ 6 ստանդարտ մշակվել է միջազգային ISO ստանդարտների, 4-ը՝ տարածաշրջանային EN ստանդարտների (եվրոպական ստանդարտ, հեղ.) հիման վրա։

Այս փաստաթղթերը, մասնավորապես, ներառում են 37 միջպետական ​​ստանդարտներ, Ռուսաստանի Դաշնության 13 ստանդարտ, Բելառուսի Հանրապետության 1 ստանդարտ և փորձարկման 2 հավաստագրված մեթոդաբանություն:

Փաստաթղթերը ներառում են տարբեր սննդային հավելումներում հիմնական բաղադրատարի զանգվածային բաժնի որոշման, բուրավետիչների և ֆերմենտային պատրաստուկների անվտանգության ցուցանիշների որոշման մեթոդներ, ինչպես նաև՝ սննդամթերքի տարբեր տեսակներում սննդային հավելումների պարունակության որոշման մեթոդներ։