«Վեոլիա Ջուր» ընկերությունը հրապարակել է 2026 թվականի ջրամատակարարման ժամանակացույցը, ըստ որի՝ Հայաստանի բնակավայրերի գերակշիռ մասում ջրամատակարարումը կլինի 17-ժամյա՝ 07:00-ից 24:00-ն։

Սա վերաբերում է ինչպես Երևանին, այնպես էլ տարբեր մարզերի խոշոր քաղաքներին՝ Գյումրի, Վանաձոր, Վաղարշապատ և այլն։ 

Ջրամատակարարման գրաֆիկին՝ ըստ բնակավայերի կարող եք ծանոթնանալ այստեղ։

Նշվում է, որ անցյալ տարիների տվյալներին, 2025-ին վաճառված ջրի ծավալը կազմել է մոտ 178.13 մլն խորանարդ մետր, ինչը 8 մլն մ³‑ով ավելի է 2024 թվականի համեմատ, իսկ արտադրությունը մոտ 0.8%‑ով նվազել է:

Սա ցույց է տալիս, որ չնայած ընդհանուր արտադրության փոքր նվազմանը, սպառման պահանջները դեռ շարունակում են մեծ մնալ։

Այս առումով «Վեոլիա ջուր» ընկերությունն այսօր նաև պարզաբանում է ներկայացրել, որը ներկայացնում ենք ստորև՝

—————

Այս օրերին մամուլում  «Վեոլիա Ջուր» ընկերության հրապարակած 2026թ. ջրամատակարարման ժամանակացույցի հետ կապված հաղորդագրություններին և հարցումներին ի պատասխան՝ տեղեկացնում ենք, որ ՀՀ հանրային ծառայությունները կարգավորող հանձնաժողովի 2016թ.-ի նոյեմբերի 30-ի N378-Ն որոշմամբ սահմանված «Խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման  կանոնների» 134 –րդ կետի պահանջի համաձայն՝  «Վեոլիա Ջուր» ՓԲԸ-ն իր պաշտոնական կայքում (veolia.am) հրապարակում է Բաժանորդի հաջորդ տարվա Ջրամատակարարման գրաֆիկը, որը կազմվում է հասցեական, այնպես, որ Բաժանորդը հնարավորություն ունենա ծանոթանալ իր Ջրամատակարարման գրաֆիկին:

Հրապարակված ջրամատակարարման ժամանակացույցը, տասնյակ հազարավոր նոր սպառողների ավելացման հաշվին, տարվա ընթացքում, ըստ անհրաժեշտության ենթարկվում է փոփոխության (հիմնականում ամռան ամիսներին), ելնելով եղանակային պայմանների փոփոխություններից, ջրամատակարարման համակարգի տեխնիկական հնարավորություններից, ջրաղբյուրների ջրատվության շուրջ 24%-ով նվազումից և կառուցապատումների արդյունքում նոր ջրասպառողների թվի կտրուկ աճից:  Ջրամատակարարման ժամանակացույցի փոփոխությունը նպատակ ունի նաև կանխել գիշերային ժամերին ջրի  կորուստները, ինչը նպաստում է ցերեկային ժամերին սպառողներին կանոնավոր ջրամատակարարմամբ ապահովելուն: 

ՀՀ կառավարության՝ ի դեմս Ջրային կոմիտեի հետ ձեռք  բերված պայմանավորվածության շրջանակներում նախատեսված է հավելյալ շուրջ 3 անգամ ավելացած ծավալով ներդրումային կապիտալ ծրագրերի շարունակական իրականացում, որը կնպաստի ֆիզիկական կորուստների նվազեցման, ինչն էլ առաջիկա տարիներին կավելացնի Երևանի բաժանորդներին մատակարարվող ջրի ծավալները: Իսկ մինչ ներդրումային ծրագրերի ավարտը՝ Ընկերությունն ունի կանոնակարգված պարտավորություն՝ տարեկան առնվազն երկու անգամ հայտարարելու ջրամատակարարման գրաֆիկների սեզոնային տատանումների մասին, որն իրականացվել է 2025 թվականի նոյեմբերին և 2026 թվականի փետրվարին:

Հարկ ենք համարում նշել, որ բաժանորդների ջրամատակարարման ժամանակացույցերի առումով Վարձակալության պայմանագրի մեկնարկից ի վեր որևէ պայմանագրային պարտավորություն  չի խախտվել: