Օդի ջերմաստիճանը կբարձրանա ևս 2-3 աստիճանով
06.10.2025
Սալմոնելա, աղիքային ցուպիկ և մանրէներ. «Զավիկի ղարսի» գործունեությունը կասեցվել է
08.10.2025
● Արամ Սահակյան
ԵԱՏՄ-ն եւ Իրանը շարունակում են զարգացնել համագործակցությունը էլեկտրոնային առևտրի ոլորտում։ Վերջին խորհրդակցություններում քննարկվել են միասնական առցանց շուկայի ստեղծման հնարավորությունները և տեխնոլոգիական ինտեգրման հեռանկարները, ինչը, որոշակի գործոնների առկայության դեպքում, կարող է նպաստել միջերկրային ապրանքաշրջանառության աճին, իսկ Հայաստանի համար՝ հեշտացնել փոքր և միջին ձեռնարկությունների՝ Իրանի շուկա դուրս գալու հնարավորությունը։
;
;
Եվրասիական տնտեսական հանձնաժողովում խորհրդակցություններ են անցկացվել, որոնց ընթացքում քննարկել են ԵԱՏՄ և Իրանի Իսլամական Հանրապետության էլեկտրոնային առևտրի հարթակների միջև հնարավոր համագործակցությունը:
Հանդիպման մասնակիցները՝ կողմերի առևտրի խոշորագույն հարթակների ներկայացուցիչները, նշել են, որ էլեկտրոնային առևտուրն այսօր միջերկրային ապրանքաշրջանառության աճի կարևոր շարժիչ ուժն է, վերահաստատել հետաքրքրվածությունը համացանցային առևտրի շրջանակներում գործընկերության իրականացման հարցում, քննարկել փոխգործակցության հնարավոր ձևաչափերը և ուղղությունները և տեխնոլոգիական ինտեգրման ներուժը:
«ԵԱՏՄ պետությունները և Իրանը զգալի ներուժ ունեն էլեկտրոնային առևտրի ոլորտում համագործակցության զարգացման համար՝ հաշվի առնելով, որ երկրներում դրա շրջանառությունն տարեց տարի սրընթաց աճ է գրանցում: Այս ոլորտում բիզնեսի փոխգործակցությունը կնպաստի առևտրի անխոչընդոտ տարածքի ձևավորմանը», — ընդգծել է ԵՏՀ մաքսասակագնային և ոչ սակագնային կարգավորման վարչության փոխտնօրեն Ասկատ Բեկովը:
Տնտեսապես, նախաձեռնությունն ունի երկու կողմերի համար էլ օգտակար լինելու ներուժ, եթե հնարավոր լինի լուծել լոգիստիկ և իրավական խոչընդոտները։
Օրինակ, նման համագործակցությունը կարող է օգտակար լինել երկու կողմերի համար՝ ընդլայնելով արտահանումը, ավելացնելով ապրանքների հասանելիությունը և խթանելով մրցակցությունը։ Իրանում արդեն առկա են զարգացած էլեկտրոնային առևտրի հարթակներ, սակայն դրանք հիմնականում կենտրոնացած են ներքին շուկայի վրա, իսկ ԵԱՏՄ–ի հետ համատեղ հարթակ ստեղծելով՝ հնարավոր կլինի դուրս գալ երկրի սահմաններից և ներգրավել նոր հաճախորդների։
Հայաստանի համար այս համագործակցությունը կարող է կարևոր նշանակություն ունենալ՝ հատկապես փոքր ու միջին ձեռնարկությունների համար, որոնք հետաքրքրված են դեպի Իրան արտահանմամբ. միասնական էլեկտրոնային առևտրի հարթակների միջոցով նրանք կկարողանան ավելի հեշտ ու արագ հասնել Իրանի շուկային, նվազեցնել միջնորդների ծախսերը և մրցակցային սակագներով ներկայացնել իրենց արտադրանքը:
Արդյունքում կմեծանա ապրանքաշրջանառությունը, կխթանվի արտադրության աճը և աշխատատեղերի ստեղծումը, ինչը երկարաժամկետ հեռանկարում կնպաստի Հայաստանի տնտեսական կայունությանը և ինտեգրմանը տարածաշրջանային շուկաներում:
Նշենք, որ խորհրդակցություններն անցկացվում են Իրանի Իսլամական Հանրապետության և Եվրասիական տնտեսական հանձնաժողովի միջև ազատ առևտրի մասին 2025թ. մայիսի 15-ին ուժի մեջ մտած համաձայնագրի իրականացման ճանապարհային քարտեզի միջոցառումների կիրարկման շրջանակներում:
