● Աննա Սարգսյան

Nestlé-ն պաշտոնապես հայտարարել է, որ հետ է կանչում իր «NAN EXPERT PRO sans lactose» (առանց լակտոզայի) 400գ մանկական կաթնախառնուրդը՝ Cronobacter spp. մանրէի հնարավոր աղտոտման պատճառով։

Լուրը հաստատել է Լյուքսեմբուրգի անասնաբուժական և սննդի անվտանգության մարմինը (ALVA / Sécurité alimentaire Luxembourg):

Cronobacter spp. (նախկինում կոչվում էր Enterobacter sakazakii) — մանրէ է, որը կարող է հայտնվել չոր մանկական սննդամթերքում, հատկապես՝ կաթնախառնուրդի մեջ, քանի որ դիմացկուն է չոր միջավայրում, իսկ կաթնածառնուրդը ցածր խոնավություն ունի։

Մանրէն հատկապես վտանգավոր է նորածինների և մինչև 2 ամսական երեխաների համար, քանի որ կարող է այնպիսի վարակների պատճառ դառնալ, ինչպիսիք են՝ սեպսիսը, մենինգիտը, աղիքային բորբոքումները և այլն։

Մանրէն կարող է հայտնվել արտադրության կամ փաթեթավորման ընթացքում, օրինակ, եթե հիգիենիկ նորմերը կանոնները խախտվել են՝ սարքավորումները լիարժեք չեն ախտահանվել, կամ աշխատակիցները չեն պահպանել մաքրությունը։

Հետկանչը վերաբերում է առանց լակտոզայի «NAN EXPERT pro» այն խմբաքանակին, որի պահման ժամկետը մինչև 2027թ. հունիսն է, խմբաքանակի համարը՝ L-51520346AC (շտրիխ կոդ՝ 8445291272521)։ Ապրանքը վաճառվել է 2025թ. հունիսի 13-ից մինչև 2025թ. նոյեմբերի 13-ը ընկած ժամանակահատվածում։ 

Nestlé-ն կոչ է արել ծնողներին՝ «անմիջապես դադարեցնել հետկանչված արտադրանքի օգտագործումը և դեն նետել այն», տուփի առկայության դեպքում՝ նաև փոխանակել։