Սննդամթերքի անվտանգության տեսչական մարմինը տեղեկացնում է, որ ՍԱՏՄ կողմից «Ռեստօրրան Գրուպ» ՍՊ ընկերությունը պատկանող հանրային սննդի օբյեկտում (ք․ Երևան, Հյուսիսային պողոտա 5, «Կորպուս Գաստրոբար») իրականացված ստուգման ընթացքում պարզվել է, որ արտադրվում է վտանգավոր սննդամթերք. լաբորատոր փորձարկման արձանագրության համաձայն՝ «Բենեդիկտ ձվով և սաղմոնով» արտադրատեսակի նմուշը աղիքային ցուպիկի խմբի մանրէներ (ԱՑԽՄ), մեզոֆիլ աէրոբ և ֆակուլտատիվ անաէրոբ մանրէներ (ՄԱՖԱնՄՔ) և ոսկեգույն ստաֆիլակոկ (S. aureus) ցուցանիշներով չեն համապատասխանել «Սննդամթերքի անվտանգության մասին» Մաքսային միության տեխնիկական կանոնակարգի պահանջներին:

Ոսկեգույն ստաֆիլակոկը (Staphylococcus aureus) պոտենցիալ վտանգավոր բակտերիա է, որը կարող է առաջացնել սննդային թունավորումներ։  Սննդամթերքի մեջ այն կարող է հայտնվել տարբեր փուլերում՝

սննդի պատրաստման,
վերամշակման,
պահեստավորման և տեղափոխման ժամանակ,

Այս բակտերիան կարող է բազմանալ արագ և արտադրել տոքսիններ (մասնավորապես՝ էնտերոտոքսիններ), որոնք չեն ոչնչացվում նույնիսկ ջերմային մշակմամբ։

Արդյունքում կարող է առաջանալ սուր սննդային թունավորում՝

• սրտխառնոցով

• փսխումով

• փորլուծությամբ

• որովայնային ցավերով

Սովորաբար ախտանիշները սկսվում են ուտելուց 2–6 ժամ անց և տևում 1–3 օր։

Հատկապես վտանգավոր է թունավորումը երեխաների, տարեցների և թուլացած իմունիտետ ունեցող անձանց համար։

—-

Աղիքային ցուպիկի խմբի մանրէները կարող են առաջացնել աղիքային թունավոր վարակներ, իսկ պատրաստի սննդամթերքում դրանց առկայությունը վկայում է սանիտարական նորմերի, պահպանման, տեղափոխման և վաճառքի պայմանների և ջերմաստիճանի, ինչպես նաև՝ արտադրության տեխնոլոգիական պայմանների խախտման մասին:

—-

ՄԱՖԱՄ- ( մեզոֆիլ աէրոբ և ֆակուլտատիվ անաէրոբ մանրէներ ): Բնութագրում է ապրանքի որակը, թարմությունն ու անվտանգությունը։ Դրա քանակի գերազանցումը վկայում է արտադրության ժամանակ սանիտարական պայմանների կամ պատրաստման տեխնոլոգիայի չպահպանման, ինչպես նաև՝ վաճառքի կետերում ապրանքի պահպանման և իրացման պայմանների խախտման մասին։ Մանրէները կարող են լինել ախտածին  և տարբեր հիվանդությունների առաջացման պատճառ դառնալ։

Տեսչական մարմնի ղեկավարի որոշմամբ՝ հանրային սննդի օբյեկտի արտադրական գործունեության առանձին գործառույթը՝ «Բենեդիկտ ձվով և սաղմոնով» արտադրատեսակի արտադրությունը կասեցվել է, մինչև հայտնաբերված խախտումները վերացնելը: