● Տաթև Խաչատրյան

Էկոնոմիկայի նախարարությունը նախագիծ է մշակել, որով առաջարկում է արագ արձագանքման համակարգ ներդնել սննդամթերքի անվտանգության ոլորտում։ 

Նախագծի ընդունմամբ, ըստ նախարարության, կկարգավորվի սննդամթերքի անվտանգության ոլորտում արտակարգ իրավիճակների դեպքում համապատասխան կառույցների արագ արձագանքման հետ կապված փոխհամագործակցությունը, կստեղծվի սննդամթերքի անվտանգության արտակարգ դեպքերին արագ և արդյունավետ արձագանքման համակարգ և նվազագույնի կհասցվի սննդային գործոնով պայմանավորված սպառողների հիվանդությունների առաջացման ռիսկերը:

Հիմնավորման մեջ նախարարությունը նշում է, որ նման նախագծի ընդունումը պայմանավորված է նրանով, որ սննդի միջոցով փոխանցվող հիվանդությունների թիվն աճում է և բացասական ազդեցություն ունենում մարդու օրգանիզմի վրա, այդ իսկ պատճառով սննդամթերքի անվտանգության ոլորտում իրականացվելիք բարեփոխումները կարևոր են։ 

Դրանցից է հենց արագ արձագանքման համակարգերի ներդրումը, որի նպատակն է սննդի հետ կապված ռիսկերը նվազագույնի հասցնել՝ ապահովելով սպառողների առողջության և իրավունքների պաշտպանության բարձր մակարդակը։ 

«Սննդամթերքի անվտանգության ոլորտում ծագած արտակարգ դեպքերում մարդկանց առողջության վրա վնասակար ազդեցության ռիսկը նվազագույնի հասցնելու համար անհրաժեշտ է, հնարավորինս արագ, շահագրգիռ բոլոր կառույցներին տեղեկացնել արտակարգ դեպքի բնույթի և չափի մասին»,-հատված նախագծից։

Բացի այդ, նշվում է, որ արտահանման-ներմուծման գործարքների ծավալների աճի պատճառով սննդամթերքի անվտանգության ոլորտի պատասխանատու դարձել են մեկից ավելի իրավասու մարմիններ, և արտակարգ դեպքերին արագ արձագանքելու համար անհրաժեշտ է այդ բոլոր մարմինների համակագրված և ժամանակին համագործակցությունը։

Հետևաբար, նախագծի գլխավոր նպատակն է ստեղծել արագ արձագանքման համակարգի շրջանակ՝ սննդամթերքի անվտանգության արտակարգ դեպքերին արագ և արդյունավետ արձագանքելու, սննդային գործոնով պայմանավորված սպառողների հիվանդությունների առաջացման ռիսկերը նվազագույնի հասցնելու համար: 

«Այն նպատակաուղղված է պաշտպանել հանրային առողջությունը՝ ապահովելով ռիսկերի մեղմմանը, աղտոտման  աղբյուրների բացահայտմանն ու հետագա վնասների կանխմանն ուղղված արագ գործողությունների կիրառումը»:

Ակնկալվում է, որ նախագծի ընդունումից հետո կկարգավորվի համապատասխան կառույցների փոխհամագործակցությունը և սննդային գործոնով պայմանավորված սպառողների հիվանդությունների առաջացման ռիսկերը կհասցվեն նվազագունի։

Նշենք, որ նախագիծը ներառված է Հայաստանի վերափոխման ռազմավարություն 2050թ., Կառավարության 2021-2026թթ. ծրագրում։