Սննդամթերքի անվտանգության տեսչական մարմինը տեղեկացնում է, որ, Ռուսաստանի Դաշնությունում արձանագրված մահվան դեպքի հանգամանքների բացահայտմանը նպաստելու նպատակով, ստուգում է իրականացնել «Ջերմուկ» հանքային ջրի արտադրող «Ջերմուկ Գրուպ» ընկերությունում:

Ստուգման ընթացքում արձանագրվել է, որ արտադրվող սննդամթերքը նույնական է՝ ըստ անվանման, տեսողական, զգայորոշման և վերլուծական մեթոդով։

Հստակեցվել է, որ արտադրական շինություններում չեն պահվում սննդամթերքի արտադրության ընթացքում չօգտագործվող ցանկացած նյութ և պարագա, այդ թվում՝ լվացող և ախտահանող նյութեր, բացառությամբ արտադրական շինությունների և սարքավորումների ընթացիկ լվացման և ախտահանման համար անհրաժեշտ լվացող և ախտահանող միջոցների։

Ընդունվող հումքը համապատասխանել է դրա անվտանգության պահանջներին և ունեցել անվտանգությունը հավաստող փաստաթղթեր։

Սննդամթերքի արտադրության ընթացքում օգտագործվող պարենային (սննդային) հումքը և բաղադրիչները պահվել են այդ հումքի և բաղադրիչների փչանալը կանխարգելող և դրանց՝ աղտոտիչ նյութերից պաշտպանությունն ապահովող պայմաններում։

«Ակնհայտ է դարձել, որ չեն արտադրվում վտանգավոր և կեղծված սննդամթերք, սննդամթերքի հետ անմիջական շփման մեջ գտնվող վտանգավոր նյութեր:

Ներկայացվել են բոլոր հիմքերը, որոնք հիմնավորում են, որ «Ջերմուկ» հանքային ջրի արտադրության գործընթացների իրականացման ժամանակ, արտադրողի կողմից մշակվել, իրականացվում և պահպանվում են վտանգի վերլուծության և հսկման կրիտիկական կետերի համակարգի (НАССР — Hazard Analysis and Critical Control Points) սկզբունքների վրա հիմնված ընթացակարգերը»։

Ստուգման արդյունքում խախտումներ չեն հայտնաբերվել:

Հիշեցնենք, որ օրեր առաջ լուրեր էին տարածվել, որ Վլադիկավկազում «Ջերմուկ» հանքային ջուրը խմելուց հետո ՌԴ քաղաքացին մահացել է հիվանդանոցում՝ «կերակրափողի այրվածքից»: Ինչից հետո «Ռոսպոտրեբնադզորը» հայտարարել էր, որ «Ջերմուկ» հանքային ջրի առանձին խմբաքանակների վաճառքը ժամանակավորապես դադարեցվում է: