Սննդամթերքի անվտանգության տեսչական մարմինը սեպտեմբերի 8-ին հայտնել էր, որ 12 քաղաքացի, որոնք «Արմավիր Գարդեն» հանրային սննդի օբյեկտում կերել էին հավի մսից պատրաստված ուտեստներ, ընդունվել էին բժշկական կենտրոն՝ «սննդային թունավորում» ախտորոշմամբ: 

Առկա սննդամթերքից նմուշառում էր կատարվել լաբորատոր փորձաքննության ներկայացնելու նպատակով, իսկ սեպտեմբերի 10-ին ՍԱՏՄ տեսուչների կողմից իրականացված վերահսկողության արդյունքում կասեցվել էր անհատ ձեռնարկատեր Զավեն Շախիկյանին պատկանող «Արմավիր Գարդեն» հանրային սննդի օբյեկտի արտադրական գործունեությունը  (քաղաք Արմավիր, Հանրապետության 2)։

Այսօր ՍԱՏՄ-ն հրապարակել է լաբորատոր փորձաքննության արդյունքները, ըստ որի՝

 «Թարմ հավ», «հավով պիցցա», «հավի թևիկներ» արտադրատեսակները մեզոֆիլ աէրոբ և ֆակուլտատիվ անաէրոբ մանրէներ  (ՄԱՖԱնՄՔ), իսկ «հավով աղցան»-ը՝ ՄԱՖԱնՄՔ և Ախտածին ա/թ սալմոնելաններ, ցուցանիշներով չեն համապատասխանել Մաքսային Միության տեխնիկական կանոնակարգերով սահմանված նորմերին:

Նշենք, որ սեպտեմբերի 9-ից, հայտնաբերված նաև սանիտարահիգենիկ խախտումների հիմքով, Տեսչական մարմնի ղեկավարի որոշմամբ, «Արմավիր Գարդեն» հանրային սննդի օբյեկտի գործունեությունը կասեցված է: