● Արամ Սահակյան

Սեպտեմբերի 2-ին Եվրասիական տնտեսական հանձնաժողովի (ԵՏՀ) կոլեգիայի նիստում հաստատվել է «Կաթի և կաթնամթերքի անվտանգության մասին» Մաքսային միության տեխնիկական կանոնակարգի (ՄՄ ՏԿ 033/2013) համապատասխան միջպետական ստանդարտների մշակման ծրագրի նոր խմբագրությունը։

Ծրագիրը պատրաստվել է Եվրասիական տնտեսական միության (ԵԱՏՄ) երկրների առաջարկների հիման վրա` հաշվի առնելով նաև ծրագրի ներկայիս տարբերակի իրականացումը, որը հաստատվել էր Հանձնաժողովի կոլեգիայի 2022թ.  որոշմամբ։

Նոր խմբագրությամբ մինչև 2029թ. վերջը նախատեսվում է մշակել (կամ վերանայել) 73 միջպետական ստանդարտ։ Դրանցից 60 նախագծի պատրաստման պատասխանատուն Ռուսաստանն է, 9-ը՝ Ղազախստանը, 2-ը՝ Հայաստանը։

Այդ երկու նոր ստանդարտների մշակումը կարևոր հնարավորություն է Հայաստանի համար՝ ոչ միայն ներառելու տեղական արտադրության առանձնահատկությունները, այլև բարձրացնելու կաթնամթերքի անվտանգության մակարդակը։ Սա հատկապես կարևոր է գյուղատնտեսական փոքր տնտեսությունների համար, որոնք մեծ դեր ունեն ներքին շուկայում, սակայն հաճախ բախվում են որակի և վերահսկողության միասնական չափանիշների բացակայությանը։

Բացի այդ, Ղազախստանը և Ղրղզստանը համատեղ կպատրաստեն ազգային կաթնամթերքի 2 միջպետական ​​ստանդարտների նախագծեր։

Նշենք, որ մի շարք ստանդարտներ մշակվում են առաջին անգամ, այդ թվում՝ կաթի սպիտակուցի խտանյութերի, մանկական սննդի համար նախատեսված շիճուկային սպիտակուցների չոր հիդրոլիզատների, ոչխարի հում և խմելու կաթի, նախադպրոցական և դպրոցական տարիքի երեխաների համար նախատեսված կաթնամթերքի և այլնի համար։

ԵՏՀ կոլեգիայի որոշումն ուժի մեջ կմտնի դրա պաշտոնական հրապարակման օրվանից 30 օրացուցային օր անց։