Սննդամթերքի անվտանգության տեսչական մարմինը տեղեկացնում է, որ Երևանի կենտրոնի տեսուչները ստուգում են անցկացրել «Դուստր Մարիաննա» ՍՊԸ-ին պատկանող կաթնամթերքի արտադրությունում՝ կատարելով նաև նմուշառումներ արտադրվող տեսականուց:

Նմուշները տրվել են լաբորատոր փորձաքննության, որի արդյունքներով՝ «պանիր չեչիլ թել» արտադրատեսակի նմուշը՝ «listeria monocitogenes», «պանիր տապակելու համար» արտադրատեսակի նմուշը՝ ԱՑԽՄ, «պանիր չանախ 45%-ոց» արտադրատեսակի նմուշը՝ «ախտածին ա/թ սալմոնելաներ», ցուցանիշներով չեն համապատասխանել Մաքսային Միության տեխնիկական կանոնակարգերով սահմանված նորմերին:

«Դուստր Մարիաննա» ՍՊԸ արտադրական առանջին գործառույթը՝ նշված արտադրատեսակների արտադրությունը, կասեցվել է, սահմանվել է խախտումները վերացնելու ժամկետ:

ՍԱՏՄ

Երեկ Սննդամթերքի անվտանգության տեսչական մարմինը հայտարարություն էր տարածել, որտեղ նշել էր, որ «Դուստր Մարիաննա» ընկերության կաթի մթերման 4 կետերում (Գեղարքունիքի մարզի Ճամբարակ քաղաքում, Արագածոտնի մարզի Արագած, Սյունիքի մարզի Գորհայք և Շիրակի մարզի Զույգաղբյուր գյուղերում գործող կետերում) հայտնաբերվել են սանիտարահիգինեիկ նորմերի խախտումներ։

Ընկերությունն էլ իր հերթին պարզաբանում էր ներկայացրել՝ նշելով, որ «մթերման կետերում մթերված կաթը մշակման երկար գործընթաց է անցնում» և մաքրվում, նոր միայն օգտագործվում տարբեր արտադրատեսակներում։