Եվրասիական տնտեսական հանձնաժողովի մրցակցության և հակամենաշնորհային կարգավորման բլոկի ներկայացուցիչները Կազանում մասնակցել են «Դեղագործական շուկաներում մրցակցության զարգացումը» միջազգային կլոր սեղանին։

Միջոցառման մասնակիցները քննարկել են դեղամիջոցների շուկայում մրցակցության ոլորտի և արտոնագրային օրենսդրության իրավական նորմերը, հարկադիր լիցենզավորման, դեղերի և բժշկական արտադրատեսակների շուկաներում հակամենաշնորհային օրենսդրության խախտումների հարցեր, արձագանքման միջոցները, լավագույն փորձը, առողջապահության ոլորտում պետական գնումները, աճուրդներում համաձայնությունների դեմ պայքարի թեման:

Եվրասիական տնտեսական միության, Անկախ պետությունների համագործակցության երկրների, ինչպես նաև ՉԺՀ-ի, Ինդոնեզիայի, Թուրքիայի, Եգիպտոսի, ՀԱՀ-ի և Մյանմարի մրցակցային մարմինների աշխատակիցները ներկայացրել են ազգային օրենսդրության կատարելագործման, դեղագործական հատվածում մրցակցության կանոնների խախտման մասին գործերի քննության փորձը։ Քննարկմանը մասնակցել են գիտական շրջանակների և դեղագործական ընկերությունների ներկայացուցիչներ։

Հանձնաժողովի պատվիրակությունը մասնակցել է ԱՊՀ պետությունների հակամենաշնորհային օրենսդրության խախտումների համատեղ հետաքննությունների շտաբի «Դեղամիջոցների և բժշկական արտադրատեսակների ապրանքային շուկաներում մրցակցության վիճակի մասին զեկույցներում առկա հանձնարարականների գործնական կիրառում» խորագրով նիստին:

ԵՏՀ մրցակցային քաղաքականության և պետական գնումների ոլորտի քաղաքականության վարչության տնօրեն Ժանար Ադիկովան նշել է. «ԵԱՏՄ-ի անդրսահմանային, այդ թվում՝ դեղագործական շուկաներում մրցակցության ընդհանուր կանոնների խախտումների նշանները դիտարկելիս Հանձնաժողովը հաշվի է առնում այդ ոլորտի ազգային և վերազգային կարգավորման առանձնահատկությունները»։

Կայացել է նաև ԲՐԻԿՍ-ի դեղագործական շուկաներում մրցակցության հիմնախնդիրների հետազոտման հարցերով աշխատանքային խմբի նիստը։