Սննդամթերքի անվտանգության տեսչական մարմինը տեղեկացնում է, որ ՍԱՏՄ Երևանի կենտրոնի տեսուչները «Մինթ» ՍՊԸ-ին պատկանող հանրային սննդի օբյեկտում (ք․ Երևան, «Ջուլիս») իրականացրել են վերստուգում և արձանագրել, որ կազմակերպությունում վերացվել են նախկինում հայտնաբերված բոլոր անհամապատասխանությունները։

Մասնավորապես՝ շտկված են եղել ոչ միայն արձանագրված սանիտարահիգիենիկ նորմերի խախտումները, այլև՝ ստուգման ընթացքում վերցված մարինացված սաղմոն ձկան և «Հոլանդեզ» սոուսի նմուշների լաբորատոր փորձարկման արդյունքներն են փաստել, որ այդ արտադրատեսակները համապատասխանում են ԵԱՏՄ տեխնիկական կանոնակարգերով սահմանված պահանջներին։

ՍԱՏՄ ղեկավարի որոշմամբ՝ «Ջուլիս» սրճարանի արտադրական գործունեության կասեցումը վերացվել է։

Հիշեցնենք, որ փետրվարի 8-ին Juli’s սրճարանում սնված 9 մարդ հոսպիտալացվել էր՝ սուր աղիքային վարակով։  Նրանց մոտ հայտնաբերվել էր սալմոնելլա:  ՍԱՏՄ-ն մարինացված սաղմոն ձկի մեջ հայտնաբերել էր աղիքային ցուպիկ և սալմոնելաներ, իսկ սոուսում՝ աղիքային ցուպիկ, ՄԱՖԱնՄՔ և Proteus ցեղի մանրէներ։ Սրճարանի աշխատակիցներից 3-ի մոտ հայտնաբերվել էր սալմոնելլա, իսկ մեկի մոտ՝ սալմոնելլա խմբի մանրէների ԴՆԹ, ինչից հետո ռեստորանի գործունեությունը կասեցվել էր։