Առողջապահական և աշխատանքի տեսչական մարմինը տեղեկացնում է, որ 2024թ. օգոստոսի 14-ին «Դեղերի և բժշկական տեխնոլոգիաների փորձագիտական կենտրոն» պետական ոչ առևտրային կազմակերպության կողմից ստացել է թիվ EL/01/1492-24 գրությունը, որի համաձայն՝ Առողջապահության համաշխարհային կազմակերպության կողմից ստացվել է տեղեկատվություն, ըստ որի՝ արտադրողի կողմից հաստատվել է Օզեմպիկ (սեմագլուտիդ) դեղի հինգ սերիաների (MP5A064, MP5A370, MP5B060, MP5D600, NP5G866) կեղծման փաստը։

Նշենք, որ օզեմպիկ (Ozempic) դեղը սեմագլուտիդ (semaglutide) կոչվող ակտիվ նյութը պարունակող դեղամիջոց է, որը օգտագործվում է երկրորդ տիպի շաքարային դիաբետի բուժման համար։ Այն նպաստում է արյան մեջ գլյուկոզայի մակարդակի կարգավորմանը՝ խթանելով ինսուլինի արտազատումը, երբ գլյուկոզայի մակարդակը բարձր է:

Օզեմպիկը սովորաբար կիրառվում է ներարկման միջոցով՝ շաբաթական մեկ անգամ, և այն նաև կարող է նպաստել քաշի նվազեցմանը, ինչը նույնպես կարևոր է շաքարախտի բուժման համար։ 

«Օզեմպիկ դեղը գրանցված չէ Հայաստանի Հանրապետությունում, իսկ վերոնշյալ սերիաների օրինական ներմուծված լինելու վերաբերյալ առկա չեն տվյալներ՝ օրենսդրությամբ սահմանված կարգով ներմուծման փորձաքննություն անցած դեղերի բազայում։

Սեմագլուտիդ պարունակող դեղը ներարկման լուծույթի ձևով է և պահանջում է «սառը շղթայի» ապահովում, ինչը չի երաշխավորվում Հայաստանի Հանրապետություն օրենքի խախտմամբ ներմուծման դեպքում։

Կեղծ դեղերի որոշ տարբերակներ պարունակում են ինսուլին, իսկ մյուսները չեն պարունակում որևէ ակտիվ դեղանյութ»,- հայտնում է ԱԱՏՄ-ն։