Երեկ՝ նոյեմբերի 13-ին կայացած Երևանի քաղաքապետարանի գործակարգավարական խորհրդակցության ժամանակ ելույթ է ունեցել նաև Առողջապահության նախարարության՝ ԱՆ «Հիվանդությունների վերահսկման և կանխարգելման ազգային կենտրոնի» ներկայացուցիչ Մարինե Քոթանյանը։

Նա քաղաքապետ Տիգրան Ավինյանի զեկուցել է, որ նոյեմբերի 3-9 ընկած ժամանակահատվածում փորձաքննել են Երևան քաղաքի տարբեր հատվածներից վերցրած ջուրը.

«Իրականացվել է 20 նմուշ ջրի լաբորատոր հետազոտություններ և արդյուքնում շեղումներ չեն արձանագրվել,-ասել է նա։- Նույն ժամանակահատվածում Երևան քաղաքի բնակիչների շրջանում արձանագրվել է աղիքային վարակի 78, օդակաթիլային վարակի 189, մանկական վնասվածքների 131, մակաբուծային հիվանդությունների 17 և քիմիական թունավորումերի 17 դեպք»,-ասել է Մարինե Քոթանյանը։

Հիշեցնենք, որ վերջերս «Անվտանգ սնունդը» նույնպես լաբորատոր փորձաքննության էր ներկայացրել Երևանի բոլոր՝ 12 վարչական շրջանների ծորակի ջրերը։ Մասնավորապես, ջրերում ստուգվել էին 26 տարբեր ցուցանիշներ՝ ինչպես անվտանգության՝ մանէաբանական ցուցանիշները ( E. coli, ԱՑԽՄ, Էնտերոկոկկեր), այնպես էլ՝ ֆիզիկաքիմիական՝ համը, հոտը, պղտորությունը, գունայնությունը, կոշտությունը, հանքայնացումը, ծանր մետաղների (ալյումինիում, բերիլիում, կադմիում, մանգան, պղինձ, մոլիբդեն, արսեն (մկնդեղ), նիկել, սնդիկ, կապար, սելեն, կոբալտ, քրոմ, բարիում), կալցիումի առկայությունը, պերմանգանատային օքսիդացումը և այլն։

Փորձաքննությամբ պարզվել էր, որ որոշ վարչական շրջաններում ջուրն ուներ խնդիրներ կոշտության, հանքայնացման և կալցիումի քանակի մասով։ Մանրէաբանական շեղումներ ոչ մի վարչական շրջանում չէին հայտնաբերվել։

Փորձաքննության արդյունքները ներկայացրել էինք նաև սննդագետին, ով, հաշվի առնելով Երևանում ջրի օրական սպառումը, հաշվարկներ է կատարել՝ գնահատելով ջրի օգտագործման, քաղկեղածին և ոչ քաղկեղածին տարրերի ռիսկերը։