● Տաթև Խաչատրյան

Օրերս  «Անվտանգ սնունդ» ֆեյսբուքյան մեր խմբում Սուսաննա Ղազարյանը գրառում էր առել՝ նշելով, որ Երևանի Բագրատունյաց փողոցի «Երևան Սիթիից» գնել է «Parmalat» յոգուրտ ( պիտանելիության ժամկետը՝ 21.10.23-25.11-23), որը բորբոսնած է եղել։

«Խնդրում եմ ստուգել ողջ խմբաքանակը, որպեսզի սպառողներին չթունավորեն բորբոսասնկերով»,-հայտնել էր նա։ 

Գրառման արձագանքել էին Սննդամթերքի անվտանգության տեսչական մարմնի աշխատակիցները՝ խնդրելով տրամադրել յոգուրտի գնումը հաստատող ՀԴՄ կտրոնը, ինչը Ս. Ղազարյանը ներկայացրել էր։

«Parmalat» յոգուրտը Հայաստան է ներմուծում «Լակտալիս արմա» ընկերությունը։

Ընկերության տնօրեն Վիկտոր Վաշչենկոն ևս արձագանքել էր գրառմանը՝ հայտնելով, որ «ցավոք, կենդանի յոգուրտների հետ նման բան լինում է», նաև նշել էր, որ ստուգում կիրականացնեն։

Վ. Վաշչենկոն մեզ հետ զրույցում հայտնեց, որ ահազանգից հետո՝ նոյեմբերի 10-ին, «Երևան Սիթի» խանութներում ստուգումներ են իրականացրել, սակայն փչացած յոգուրտներ չեն հայտնաբերել. սուպերմարկետի բոլոր խանութներում ընտրովի նույն խմբաքանակի 10-ական յոգուրտ են բացել, բայց ոչ մեկում բորբոս չեն հայտնաբերել։ 

«Եթե ​​դա լիներ ևս մեկ տուփում, ապա դա խնդիր կլիներ, և մենք կշարունակեինք ստուգումները»,-ասաց Վ. Վաշչենկոն։

Ըստ նրա՝ կա’մ ջերմային ռեժիմը չի պահպանվել, կա’մ փաթեթն է վնասվել.

«Որպես կանոն՝ յոգուրտները փչանում են երկու պատճառով՝ կա՛մ +2 C+ 6 C ջերմաստիճանային ռեժիմը չպահպանելիս, կա՛մ փաթեթավորման հերմետիկությունը խախտելիս. կոպիտ ասած՝ առաջանում է միկրոճաք, անցք, ինչի արդյունքում օդը մտնում է յոգուրտի մեջ և այն փչանում է։ Ցավոք, պատահում է, և ոչինչ անել հնարավոր չէ, քանի որ յոգուրտը բնական է»,- մեզ հետ զրույցում նշեց տնօրենը։ 

Վաշչենկոն ասաց, որ ջերմային ռեժիմի խախտման դեպքում, օրինակ, առաքման ժամանակ, հնարավոր է, գերտաքացում լինել. եթե ​​ապրանքը երկար ժամանակ մնա ջերմային ազդեցության տակ, ապա հետո այն սառնարանում դնելը չի փրկի։

Փաթեթավորումը, տնօրենի խոսքով, կարող է վնասվել թե’ պահեստում, թե’ մակնշման, պիտակավորման, թե’ առաքման  ժամանակ.

«Եթե արկղը խնամքով չի դրվում մյուս արկղի վրա, փայլաթիթեղը կարող է պայթել, ինչը նշանակում է, որ օդ կներթափանցի, և ապրանքը կսկսի փչանալ: Եթե ապրանը գնեք և անմիջապես ուտեք, դուք դա չեք էլ նկատի, բայց եթե այն 5 օրից ավելի մնա, ապա անպայման կփչանա. կարող է թթվել կամ բորբոսնել»,-ասում է նա։ 

Հետաքրքրվեցինք՝ խանութներում ստուգե՞լ են սառնարանային պայմանները, արդյո՞ք դրանք պատշաճ են պահվում, Վաշչենկոն ասաց, որ իրենք վերահսկում սառնարանները. հատուկ մերչենդայզերներ ունեն, որոնք հետևում են ընկերության ողջ տեսականուն տարբեր խանութներում։ Բացի այդ, այլ ապրանքներ ևս կփչանային։

Ինչ վերաբերում է ջերմային ռեժիմի խախտմանը ապրանքի մատակարարման / առաքման ընթացքում,  Վ. Վաշչենկոն ասում է, որ իրենք ունեն բացառիկ մատակարար Հայաստանում, ում վստահում են.

«Իրենց պահեստում ամեն ինչ սահմանված ջերմաստիճանի պայմաններում է, ես սա գիտեմ, դրանում համոզված եմ, բայց կա մի պահ. Հայաստանի օրենսդրությամբ ակցիզային դրոշմապիտակը փակցվում է ձեռքով, իսկ ձեռքով փակցնելիս միշտ կա մարդկային գործոն. մարդը կարող է գցել ապրանքը, փոքր անցք անել ու չնկատել»,-ասում է տնօրենը։

Ամեն դեպքում, Վ. Վաշչենկոն նշում է, որ հակված է նրան, որ փաթեթն է վնասված եղել միկրոճաքով, բայց թե կոնկրետ որ փուլում է դա տեղի ունեցել՝ ապրանքի պիտակավորման, առաքման, թե դարակներում դնելու ժամանակ, չի կարող ասել։

Նրա խոսքով՝ թեև արտադրողը երաշխիք է տալիս միայն պատշաճ փաթեթավորված ապրանքի համար, երբ այն չունի որևէ մեխանիկական վնասվածք, այնուամենայնիվ, իրենց ապրանքանիշի փչացած կամ ոչ պատշաճ ապրանք հանդիպելիս սպառողները միշտ էլ կարող են դիմել իրենց. իրենք կընդունեն ապրանքը, նույնիսկ եթե խանութը մերժի։

Այս դեպքի մասով՝ ՍԱՏՄ-ից մեզ հայտնեցին, որ իրենք տնտեսվարողին զգուշացրել են, սպառողին էլ՝ բացատրել , որ նման դեպքեր խմբաքանակում կարող են լինել։