Այսօր «Անվտանգ սնունդ» մեր ֆեյսբուքյան խմբում ԱՆժելա Բադալյանն ահազանգել էր, որ գնել է «Yeremyan Products» / «Երեմյան Փրոդաքթս»-ի ազնվամորու յոգուրտ, որի մեջ քար է եղել.

«Քարի կտոր Yeremyan Products-ի  յոգուրտում, խանութը չեմ նշում, հաստատ քարի կտորը խանութում չի ընկել  յոգուրտի մեջ»,-հայտնել էր նա։

Ընկերությունն արձագանքել է ահազանգին՝ նշելով, որ գնահատում է հաճախորդների վստահությունը և պատասխանատու է իր արտադրանքի որակի համար։

Նրանք վստահեցրել են, որ յոգուրտի արտադրությունը ենթարկվում է խիստ հսկողության, և տարայավորումը իրականացվում է ավտոմատ, «որը բացառում է այսպիսի խնդիրը», սակայն, այնուամենայնիվ, իրենք «արդեն իսկ ուսումնասիրում են այս արտադրանքի հետ կապված հանգամանքները՝ բացառելու նման երևույթների կրկնությունը»։

Բացի այդ, «Երեմյան Փրոդաքթս»-ից Ա. Բադալյանին առաջարկել են այցելել գործարան՝ արտադրական գործընթացներին, մասնավորապես՝ սանիտարական պայմաններին ծանոթանալու համար։

Ընկերության պատասխանն ամբողջությամբ ներկայացնում ենք ստորև. 

Հարգելի Անժելա

Շնորհակալություն խնդիրը նկատելու և արագ արձագանքելու համար: Մենք գնահատում ենք մեր հաճախորդների վստահությունն ու հավատարմությունը, և պատասխանատու ենք յուրաքանչյուր ապրանքի համար, որը կրում է մեր անունը:

Ցանկանում ենք Ձեզ վստահեցնել, որ մեր արտադրանքի յուրաքանչյուր խմբաքանակ մինչև շուկա դուրս գալը ենթարկվում է որակի խիստ հսկողության: Ձեր կարծիքը ընդգծում է մի խնդիր, որին մենք շատ լուրջ ենք վերաբերվում, և արդեն իսկ ուսումնասիրում ենք այս արտադրանքի հետ կապված հանգամանքները՝ բացառելու նման երևույթների կրկնությունը։

Մեր սպառողների առողջությունը, գոհունակությունը և վստահությունը առաջնային են:

Ուզում ենք տեղեկացնել, որ մեր յոգուրտները պարունակում են միայն բնական հումք, իսկ տարայավորումը իրականացվում է ավտոմատ կերպով, որը բացառում է այսպիսի խնդիրը, սակայն տեսնելով սա մենք ևս մեկ անգամ կիրականացնենք խիստ ստուգումներ հումքում և արտադրական պրոցեսներում։

Ցանկանում ենք հրավիրել Ձեզ մեր գործարան՝ անձամբ հետևելու սանիտարական ճշգրիտ պայմաններում իրականացվող գործընթացներին։

Ցավում ենք պատճառած անհարմարության համար և հուսով ենք, որ այս դեպքը չի նվազեցնի Ձեր վստահությունը մեր հանդեպ:

Շնորհակալություն ըմբռնման համար։

Երեմյան Կաթնամթերք

Կաթը սեր է