Երեկ՝ փետրվարի 22-ին, «Անվտանգ սնունդ»  մեր ֆեյսբուքյան խմբում Վարդուհի Գասպարյանն ահազանգել էր, որ գնել է «Գրանդ Քենդիի»  «Красная шапочка» («Կարմիր գլխարկ») կոնֆետը, որի մեջ որդ է եղել։

Նա նշել էր, որ գնել է հենց ընկերության խանութից, որը գտնվում է Երևանի Կիևյան փողոցում։ 

«Բոլոր կոնֆետները փչացած էին»,-հայտնել էր նա։

Այսօր՝ ավելի վաղ, խմբի անդամներից Թագուհի Մելիքյանը նույնպես ահազանգել էր, որ 3 օր առաջ Աբովյան քաղաքի «Սոլադո» սուպերմարկետից գնել է «Գրանդ Քենդի» ընկույզով կոնֆետը («Շոկոլադապատ չրեր») ՝ բորբոսնած։

«Սա առաջին դեպքը չէ, նախորդ անգամ հավաստիացրեցին, որ նոր են ստացել: Այդ իսկ պատճառով այս անգամ դիմել եմ նաև Գրանդ Քենդի ընկերությանը»,-հայտնել էր նա։

Քիչ անց Թ. Մելիքյանը հայտնել էր, որ ընկերությունն արձագանքել է իր ահազանգին՝ ասելով, որ «ստուգայց կկատարեն տվյալ վաճառակետ պարզելու խնդրի առաջացման պատճառը և լուծում տալու»:

Սննդամթերքի անվտանգության տեսչական մարմնից արձագանքել էին այս երկու գրառումներին՝ ճշտելով խանութների հասցեն։ Ապա ՍԱՏՄ-հայտնել էին, որ տեսուչը նույնպես կացելի «Սոլադո» սուպերմարկետ։

Մեր խմբում մի շարք նմանատիպ բողոքներ ենք ստացել ընկերության կոնֆետներից։ Մեկնաբանություններում, հիմնականում, երկու տեսակետ է քննարկվում. «մեղավոր է խանութը, որ սխալ է պահում, մեղավոր է ընկերությունը»։

Այս առումով՝ նշենք, որ կոնֆետներում որդեր կարող են առաջանալ տարբեր փուլերում՝ թե’արտադրական գործընթացի , թե’ սխալ պահման պայմանների պատճառով։

Հետևաբար, սննդի որդնածության պատճառը հասկանալու համար պետք է ուսումնասիրել սննդի արտադրության փուլերը. շատ կարևոր է հենց հումքի անվտանգությունը և արտադրական պայմանները։ Օրինակ, եթե հումքը պատշաճ վերահսկողության չի ենթարկվել, և դրա մեջ եղել են թրթուրներ, արտադրության փուլում պետք է ճիշտ տեխնոլոգիաների կիրառել և ջերմային ռեժիմներ օգտագործել՝ դրանց վերացնելու համար։

Բացի այդ, իրացման ցանցում հինն ու նորը կարող են խառնվել իրար, և եթե հին խմբաքանակի մեջ արդեն իսկ կա որդ կամ թրթուր, ապա արտադրանքը կարող է աղտոտվել։