Մարտի 24-ին Եվրասիական տնտեսական հանձնաժողովի կոլեգիան ընդունել է «Եվրասիական տնտեսական միության անդամ պետությունների և Հարավարևելյան Ասիայի երկրների միջև գյուղատնտեսական արտադրանքի և պարենի հարցերով առևտրատնտեսական համագործակցության զարգացման հեռանկարների մասին» հանձնարարականը։

ԵՏՀ-ն հայտնում է, որ իր կողմից իրականացված վերլուծությունը ցույց է տվել, որ անդամ պետությունների՝ Հարավարևելյան Ասիայի երկրների շուկաներ մուտքի առավել բարենպաստ պայմաններ ունեցող հիմնական ապրանքներն են միսը և մսամթերքը, կաթնամթերքը, ձուկն ու խեցգետնանմանները, հացահատիկայինները, ինչպես նաև՝ ճարպերն ու յուղերը:

«Ընդունված հանձնարարականն անդամ պետություններին թույլ կտա օգտագործել առկա կարիքների մասին տեղեկատվությունը գյուղատնտեսական արտադրանքի արտահանման տարբերակման հնարավորությունները գնահատելու նպատակով», — նշել է ԵՏՀ արդյունաբերության և ագրոարդյունաբերական համալիրի նախարար Գոհար Բարսեղյանը։

Նշենք, որ Հարավարևելյան Ասիան ներառում է 16 երկիր (Աֆղանստան, Բանգլադեշ, Բրունեյ, Կամբոջա, Ինդոնեզիա, Լաոս, Մալայզիա, Մյանմա (Բիրմա), Նեպալ, Պակիստան, Ֆիլիպիններ, Սինգապուր, Թայվան, Թաիլանդ, Տիմոր-Լեսթե և Վիետնամ)։

Հարավարևելյան Ասիայի տնտեսական միությունն (ASEAN) ընդգրկում է 10 երկիր՝ Ինդոնեզիա, Մալայզիա, Մյանմա, Բրունեյ, Կամբոջա, Լաոս, Ֆիլիպիններ, Սինգապուր, Թաիլանդ և Վիետնամ, որոնք միասին աշխատում են համատեղ տնտեսական զարգացման ու համագործակցության ուղղությամբ։