Այսօր` օգոստոսի 20-ին, մեր՝  «Անվտանգ սնունդ»  ֆեյսբուքյան խմբում Աննա Ջավախյանը իր դժգոհությունն է հայտնել Երևանի «Զովք սուպերմարկետ»-ում ( Գյուլբենկյան 19/3) եղած «հակասանիտարական մոտեցման» մասին, մասնավորապես, տարբեր տեսակի մթերքներ իրար կողք դնելու, ձեռնոցներ չօգտագործելու, աձանացված սեղաններ չունենալու մասին։

Նա նշել էր, որ երկրորդ անգամ է ահազանգում այս խնդրի մասին. առաջին անգամ Սննդամթերքի անվտանգության տեսչական մարմինն արձագանքել էր, սակայն որևէ ընթացք չէր տրվել։ 

«Տուփով մեկանգամյա օգտագործման ձեռնոցներն աշխատակիցների ձեռքի տակ լինելով հանդերձ` չեն փոխում ամեն անգամ ձվին կպնելուց հետո։ Նույն թաղանթապատման սարքի վրա սալմոնելայի վարակի աղբյուր հանդիսացող ձվի լատոկն են դնում, թաղանթապատում, հետևից էլ` բաց կտորով պանիրը, կարագը։ Հենց այդպես՝ բաց֊բաց, առանց որևէ տակդիրի դնում են սարքի վրա։ Առանձնացված չեն ձվի սեղանը, պանիր ու կարագ կտրելու համար նախատեսված սեղանից։ Քանի անգամ տեսել եմ, որ նույն սեղանի վրա են կտրում, որտեղ ձուն էին դրել վայրկյաններ առաջ։ Հակասանիտարական մոտեցում է սա` հակասող սննդի անվտանգության բոլոր նորմերին, ինչպե՞ս կարելի է թույլ տալ, չեմ հասկանում։

Հարկավոր է խանութներին պարտադրել, որ ձվի համար հատկացվի, նախ, առանձին թաղանթապատման սարք, առանձին սեղան, և նաև պարտադիր հեռացվի կտրատվող պանիրների, կարագի ու երշիկների կողքից, որոնք պարբերաբար բաց վիճակով հայտնվում են նույն արտադրական սեղանի ու թաղանթապատման սարքի վրա, որտեղ ձուն էին 2 վայրկյան առաջ դրել։ Աշխատակիցը, ով առնչվում է ձվի հետ, չպետք է որևէ կերպով առնչվի նաև բաց վիճակում վաճառվող լվանալու ոչ ենթակա մթերքի հետ»։

Բողոքը կարճ ժամանակահատվածում տասնյակ մեկնաբանություններ էր հավաքել, որտեղ մարդիկ նույնպես դժգոհում էին խանութներում եղած հակասանիտարական վիճակից և պահման պայմանների խախտումներից՝ պատմելով իրենց օրինակները։

• Միլենա Եսայան.

«Մի քանի օր առաջ ձու եմ գնել 30 հատ, որը դրած էր երշիկի սառնարանի ՎՐԱ։ Բերել եմ տուն, իբր ժամկետը նորմալ՝ 30 ձվից 14ի մեջ, եթե ոչ ավել կոտրում էի սև կամ կանաչ ձու։ Նկարներն էլ ունեմ։ Գնացի խանութ ասեցի, ասեցին՝ ուղղակի տեղ չունենք սառնարանում դնելու։ Արդյունքում, անիմաստ գումարի վատնում+ նեխած ձու, մնացածն էլ թափել եմ աղբը»։

• Վարդի Մ-յան. 

«Տիտան ցանցի հաճախորդ եմ, միշտ խոզի ծխեցրած կողերը սառնարանի վրա բաց վիճակում դրված են։ Մի օր երեխաս խնդրեց դրանից գնել, ասացի՝ ի՞նչ իմանաս՝ քանի մարդ է փռշտացել դրա վրա, աշխատողը բերանը ճպպացրեց, ինձնից առաջ կանգնած հաճախորդն էլ, որ խնդրել էր իր համար կտոր կտրել, հրաժարվեց վերցնել ու հեռացավ։ Իհարկե, դեպքից մոտ 1 տարի է անցել, բայց կողոսկրերը դեռ նույն տեղում են»։

• Ալինա Ավագյան.

«Փոքր խանութներում ավելի ահավոր վիճակ է. ոչ ոք չի հետևում, թէ երշիկը երբ կտրվեց, քանի օր պահվեց ու նման լիքը հարցեր։ Կաթնեղենը ստանում են, ժամերով մնում է դրսում մինչև դասավորում են սառնարանները»

• Սաթեն Արաբխանյան.

«Այո, իրավացի եք, նաև դանակը, որով կտրատվում է ամեն ինչ և հազարից {մեկ է} մաքրվում, այն էլ՝ ահավոր կեղտոտ ինչ-որ լաթով»։

• Վիկտորիա Հակոբյան.

«Թարմ, բաց հավամթերքի կողքը դրված է բաց տարայով զեյթուն, երբ զգուշացրել եմ, շատ ագրեսսիվ հակադարձել են` չեք ուզում, մի գնեք»։

• Լյուսի Լուսինա Շալունց. 

«Հացի փռերում նույն կինը համ լավաշն ա կշռում, վերջում էլ ձեռքը լեզվով խոնավեցնում ա և տոպրակի մեջ դնում և գումարը վերցնում։ Ինչքա՞ն եմ խոսել, ինչքան եմ ասել, ինչքան եմ վիճել, վերջը մի տեղ սովորեցին։ Հենց ինձ տեսնում են, ինձ ձեռնոցը արագ հագնում են»։

• Արմինե Հայրապետյան.

«Ու որ ասում ես, թարս են նայում աշխատակիցները, տեսնես ` որ մարմինն ա պատասխանատու էս անգրագիտության ու անօրինության համար»։

Ա. Ջավախյանի բողոքին արձագանքել էր Սննդամթերքի անվտանգության տեսչական մարմինը՝ նշելով, որ կզբաղվեն խնդրով.

«Խնդրում եմ նշել հստակ հասցե կամ ՀԴՄ կտրոն տրամադրեք, որպեսզի կարողանանք բողոքին ընթացք տալ»,-նշել էր ՍԱՏՄ-ն։ 

Ի պատասխան ՍԱՏՄ-ին Ա. Ջավախյանը նաև հավելել էր, որ խնդիրը առկա է նաև այլ սուպերմարկետներում։