Կոտայքի մարզի Բյուրեղավան համայնքում 2026 թվականի հուլիսի 17-ից արձանագրված աղիքային վարակների դեպքերի առնչությամբ շարունակվում են համաճարակաբանական ուսումնասիրություններն ու կանխարգելիչ միջոցառումները։ Այս մասին տեղեկացնում է Առողջապահության նախարարության «Հիվանդությունների վերահսկման և կանխարգելման կենտրոնը»։

ՀՎԿԱԿ-ը սերտ համագործակցում է Բյուրեղավանի պոլիկլինիկայի, Բյուրեղավան համայնքի տեղական ինքնակառավարման մարմինների և մյուս շահագրգիռ գործընկեր կազմակերպությունների հետ՝ վարակի հետագա տարածումը կանխելու և իրավիճակը վերահսկողության տակ պահելու նպատակով։

Համաճարակաբանական հետազոտության շրջանակում իրականացվել են ջրի և կենսաբանական նմուշների նմուշառումներ․

• վերցվել է 14 ջրի նմուշ,
• վերցվել է 13 կենսաբանական նմուշ բուժառուներից։

Լաբորատոր հետազոտության արդյունքներով՝ ջրի 14 նմուշառման կետերից 3-ում արձանագրվել են շեղումներ։

Կենսաբանական նմուշների լաբորատոր արդյունքները դեռևս պատրաստ չեն։

«Այն ջրային կետերում, որտեղ հայտնաբերվել են շեղումներ, իրականացվում են կրկնակի նմուշառումներ։ Միաժամանակ նմուշառումներ են կատարվում նաև նոր արձանագրված աղիքային վարակի օջախներում»,-հայտնել են ՀՎԿԱԿ-ից։

Հիշեցնենք, որ հուլիսի 17-ին  Բյուրեղավանում արձանագրվել էին աղիքային վարակի դեպքեր, 6 մարդ հոսպիտալացվել էր։ Դրանից հետո էլ «Վեոլիա ջուր» ընկերությունը նշել էր, որ լրացուցիչ հետազոտություններ կիրականացնեն։