● Տաթև Խաչատրյան

Ռուսական կողմի առաջարկությամբ՝ Եվրասիական տնտեսական հանձնաժողովի (ԵՏՀ) խորհուրդը որոշել է 6 ամսով հետաձգել «Ալկոհոլային արտադրանքի անվտանգության մասին» ԵԱՏՄ տեխնիկական կանոնակարգն ուժի մեջ մտնելը՝ 2024թ հունվարի 1-ից 2024թ. հուլիսի 1-ը։

Հետաձգման պատճառն այն է, որ տեխանոնակարգում պետք է մի շարք տեխնիկական փոփոխություններ կատարել և համաձայնեցնել։

Սահմանված ժամկետում փոփոխությունները կատարելու համար ԵՏՀ-ն նույն որոշմամբ՝ Ռուսաստանին առաջարկել է ոչ ուշ քան փոփոխությունների՝ ուժի մեջ մտնելուց 4 ամիս հետո ԵԱՏՄ անդամ երկրներում ապահովել տեխնիկական կանոնակարգի փոփոխությունների նախագծերի մշակումն ու հաստատումը` համաձայն ԵԱՏՄ տեխնիկական կանոնակարգերի մշակման, ընդունման, փոփոխման և չեղարկման կարգի 46-րդ կետի։

Նույն ժամանակահատվածում անհրաժեշտ է լուծել գարեջրագործությանը և գինեգործությանը ներկայացվող պահանջներին վերաբերող հարցեր։

Ըստ ԵՏՀ Խորհրդի՝ որոշումը կվերացնի տեխնիկական կանոնակարգի որոշ դրույթներում առկա անճշտությունները և տեխնիկական սխալները, ինչը թույլ կտա տնտեսվարողներին խուսափել սպառողներին մոլորեցնելուց, ինչպես նաև՝ վերացնել քաղաքացիների առողջությանն ու կյանքին հասցվող հնարավոր վնասները։