● Տաթև Խաչատրյան 

Առողջապահության նախարարությունը նախագիծ է մշակել, որով ազատազրկված շահառուները առողջության առաջնային պահպանման օղակի միջոցով անվճար կստանան «Հիմնական դեղերի ցանկ»-ի դեղերը: 

Նախագծով, մասնավորապես, փոփոխվելու է Կառավարության 2019թ. մայիսի 30-ի N 642-Ն որոշումը, որտեղ ներկայացված են բնակչության սոցիալական կամ հատուկ խմբերի և այն հիվանդությունների ցանկերը, որոնց դեպքում դեղերը հատկացվում են դրանց արժեքի լրիվ կամ մասնակի փոխհատուցմամբ։ Այս խմբերում ներառվել են նաև քրեակատարողական հիմնարկներում պահվող կալանավորված և ազատազրկման դատապարտված անձինք։

2023թ. հոկտեմբերի տվյալներով՝ Հայաստանի քրեակատարողական հիմնարկներում կա 2481 կալանավորված և ազատազրկման դատապարտված անձ։ 2024թ.ին ընթացքում նախատեսվում է նրանց տրամադրել շուրջ 39 մլն. ՀՀ դրամ արժողությամբ անվճար դեղեր։

Ազատազրկված անձանց ճնշող մեծամասնությունը 20-60 տարեկան տղամարդիկ են, որոնց զգալի մասը, ըստ ԱՆ-ի, ունեն վնասակար սովորություններ՝ թմրամոլներ են, ալկոհոլային և նիկոտինային կախվածություն, հոգեկան առողջության խնդիրներ ունեցող անձինք:

Հայսաստանի 10 քրեակատարողական հիմնարկներում արտահիվանդանոցային բժշկական օգնություն և սպասարկում իրականացնում է ԱՆ «Քրեակատարողական բժշկության կենտրոն» ՊՈԱԿ-ը։ Վերջինս և ձեռք է բերում դեղեր, բժշկական պարագաներ, լաբորատոր, ստոմատոլոգիական և ախտահանիչ նութեր:

2022թ.ին ընթացքում ՊՈԱԿ-ը ձեռք է բերել 78,425 մլն. ՀՀ դրամի 445 անվանում դեղեր, բժշկական պարագաներ, լաբորատոր, ստոմատոլոգիական և ախտահանիչ նյութեր, 2023թ.ին՝ 70 մլն. ՀՀ դրամի։

2024թ.ի ընթացքում միայն դեղեր կտրամադրվեն շուրջ 39 մլն. ՀՀ դրամի: Բայց 2024թ.ի պետական բյուջեի ծախսերի ավելացում չի նախատեսվում, քանի որ Առողջապահության նախարարությանը հատկացվող գումարը մոտ 500 մլն դրամով ավելացել է (2022թ-ին հատկացվել էր 1.179.764,5 ՀՀ հազ. դրամ, 2023թ.ին՝ 1.675.265,59 ՀՀ հազ. դրամ և ֆինանսական միջոցների հատկացումը շարունակաբար տրամադրվելու է նաև 2024թ.ին)։

Նշված միջոցառումներն ընդգրկված են ՀՀ 2024-2026թթ. պետական միջնաժամկետ ծախսերի ծրագրի և 2024թ  պետական բյուջեի հայ­տե­րում:

Դեղերի ցանկին մանրամասն կարող եք ծանոթանալ այստեղ