Հունվարի 1-ից մեկնարկելու է նորածնային ակնային սքրինինգը, որը կլինի 8-րդը մանկական սքրինինգային ծրագրերում: Այս մասին տեղեկացնում է Առողջապահության նախարարությունը։ 

Տեսողության մի շարք խանգարումներ, հիվանդություններ և բնածին արատներ նորածնային շրջանում դեռևս չեն արտահայտվում կլինիկական նշաններով, սակայն վաղ ախտորոշումն ու միջամտությունը հնարավորություն են տալիս կանխել տեսողության անդառնալի կորուստը և ապահովել երեխայի նորմալ տեսողության զարգացումը։

Այս սքրինինգի նպատակն է վաղ հայտնաբերել այն ակնային ախտաբանությունները, որոնք կարող են տեսողության նվազման բերել, անդառնալի կորստի կամ ուշ ախտորոշման դեպքում պահանջել բարդ և երկարատև բուժում:

Առավել կարևոր են հետևյալ վիճակների վաղ հայտնաբերումը, որոնք կարելի է իրականացնել նորածնային ակնային սքրինինգի միջոցով.

• բնածին կատարակտա
• բնածին գլաուկոմա
• ռետինոբլաստոմա
• տեսողական օրգանի ծանր անոմալիաներ։

Ծրագրի մեկնարկից առաջ «Հայկական ակնաբուժության նախագիծ» բարեգործական հիմնադրամի հետ համատեղ իրականացվել են նորածնային ակնային սքրինինգի վերապատրաստման դասընթացներ՝ ընդգրկելով Հայաստանի Հանրապետության ամբողջ տարածքում գործող ծննդատների ու նեոնատալ ինտենսիվ թերապիայի բաժանմունքների մասնագետներին։

Ծրագրի շրջանակում շուրջ 100 նեոնատոլոգ և բուժքույր մասնակցել են մասնագիտական վերապատրաստմանը, բարելավել այս ուղղությամբ կարողությունները` նորածինների տեսողության խնդիրները վաղ ախտորոշելու համար, ինչը կնպաստի կանխարգելելի կուրության նվազեցմանը Հայաստանում։