Սննդամթերքի անվտանգության տեսչական մարմինը տեղեկացնում է, որ ՍԱՏՄ ղեկավարի որոշմամբ՝ կասեցվել է «Վանանդ Կաթ» ՍՊԸ-ին պատկանող կաթնամթերքի արտադրամասի արտադրական գործունեության առանձին գործառույթը՝ «Կաթ պարունակող մթերք՝ կաթնայուղի փոխարինիչով, պատրաստված աղաջրային պանրի տեխնոլոգիայով» արտադրատեսակի արտադրությունը (քաղաք Արմավիր, Շահումյան փողոց):

Կասեցման հիմքը լաբորատոր փորձաքննության արդյունքն է, համաձայն որի՝ տվյալ արտադրատեսակի 05.11.2025թ. և 10.11.2025թ. արտադրված նմուշները Մաքսային Միության տեխնիկական կանոնակարգով սահմանված նորմերին չեն համապատասխանել կաթնայուղի զանգվածային մաս ցուցանիշով. կաթնայուղի զանգվածային մասը նվազագույն 50%-ի փոխարեն եղել է 1-5%, հետևաբար, այն համարվում է վտանգավոր և կեղծված սննդամթերք:

Արմավիրի մարզում կասեցվել է նաև է «Վանուշ և Էդգար Հովհաննիսյաններ» ՍՊ ընկերությանը պատկանող կաթնամթերքի արտադրամասի (Արմավիրի մարզ, Քարակերտ բնակավայր) արտադրական գործունեության առանձին գործառույթը՝ կաթնայուղի փոխարինիչով, աղաջրային պանրի տեխնոլոգիայով պատրաստված կաթ պարունակող մթերքի՝ «Ջաջուռ» արտադրատեսակի, արտադրությունը (արտադրված՝ 11․11․2025թ․):

Որոշման հիմքը ՍԱՏՄ Երևանի կենտրոնի տեսուչների արձանագրությունն է վտանգավոր սննդամթերքի արտադրության մասին, այն է՝ նշված արտադրատեսակի փորձաքննության ներկայացված նմուշը «կաթնայուղի զանգվածային մաս» ցուցանիշով չի համապատասխանել Մաքսային Միության տեխնիկական կանոնակարգի պահանջներին. կաթնայուղի զանգվածային մասն արձանագրվել է 1-5%, հետևաբար, այն նույնպես համարվում է վտանգավոր և կեղծված սննդամթերք:

Խախտումները վերացնելու համար երկու ընկերությունների համար սահմանվել է վերջնաժամկետ:

Նշենք, որ Մաքսային Միության «Կաթի և կաթնամթերքի անվտանգության մասին» 033/2013 տեխնիկական կանոնակարգի պահանջով՝ «կաթնային ճարպի փոխարինիչով կաթ պարունակող մթերք»-ում կաթնային ճարպը բացառապես կաթնային ճարպի փոխարինիչով կարելի է փոխարինել միայն 50% ոչ ավելի քանակությամբ: