Սննդամթերքի անվտանգության տեսչական մարմինը տեղեկացնում է, որ «Ոսկե Կաթ» ՍՊ ընկերությանը պատկանող կաթնամթերքի արտադրամասում (Կոտայքի մարզ, գյուղ Զովունի) իրականացված վերահսկողության շրջանակներում պարզվել է, որ արտադրվել է սննդամթերքի անվտանգության ոլորտի իրավական ակտերով սահմանված անվտանգության և սննդամթերքի հիգիենային ներկայացվող պահանջների անհամապատասխանությամբ վտանգավոր սննդամթերք։

Փորձաքննության արդյունքում պարզվել է, որ «Կաթ պարունակող մթերք Չանախ» (արտադրված՝ 15․06․26թ․) արտադրատեսակի նմուշը՝ ԱՑԽՄ (աղիքային ցուպիկի խմբի մանրէներ) և S. Aureus (ոսկեգույն ստաֆիլակոկ) ցուցանիշներով, «Պանիր Լոռի» (արտադրված՝ 21․05․26թ.), «Կաթ պարունակող մթերք կաթնայուղի փոխարինիչով Լոռի» (արտադրված՝ 14․06․26թ․) նմուշները՝ ԱՑԽՄ ցուցանիշով չեն համապատասխանել «Կաթի և կաթնամթերքի անվտանգության մասին» Մաքսային միության տեխնիկական կանոնակարգի պահանջներին:

Տեսչական մարմնի ղեկավարի որոշմամբ՝ կաթնամթերքի արտադրամասի արտադրական գործունեության առանձին գործառույթը՝ «Կաթ պարունակող մթերք Չանախ», «Պանիր Լոռի», «Կաթ պարունակող մթերք կաթնայուղի փոխարինիչով Լոռի» արտադրատեսակների արտադրությունը, կասեցվել է:

Աղիքային ցուպիկի խմբի մանրէները կարող են առաջացնել աղիքային թունավոր վարակներ, իսկ պատրաստի սննդամթերքում դրանց առկայությունը վկայում է սանիտարական նորմերի, պահպանման, տեղափոխման և վաճառքի պայմանների և ջերմաստիճանի, ինչպես նաև՝ արտադրության տեխնոլոգիական պայմանների խախտման մասին:

Ոսկեգույն ստաֆիլակոկը (Staphylococcus aureus) պոտենցիալ վտանգավոր բակտերիա է, որը կարող է առաջացնել սննդային թունավորումներ։  Սննդամթերքի մեջ այն կարող է հայտնվել տարբեր փուլերում՝

սննդի պատրաստման,
վերամշակման,
պահեստավորման և տեղափոխման ժամանակ,

Այս բակտերիան կարող է բազմանալ արագ և արտադրել տոքսիններ (մասնավորապես՝ էնտերոտոքսիններ), որոնք չեն ոչնչացվում նույնիսկ ջերմային մշակմամբ։

Արդյունքում կարող է առաջանալ սուր սննդային թունավորում՝

• սրտխառնոցով

• փսխումով

• փորլուծությամբ

• որովայնային ցավերով

Սովորաբար ախտանիշները սկսվում են ուտելուց 2–6 ժամ անց և տևում 1–3 օր։

Հատկապես վտանգավոր է թունավորումը երեխաների, տարեցների և թուլացած իմունիտետ ունեցող անձանց համար։

Սահմանվել է վերջնաժամկետ արձանագրված խախտումները վերացնելու համար: