● Տաթև Խաչատրյան

Եվրասիական տնտեսական հանձնաժողովի Կոլեգիան որոշում է ընդունել՝ սահմանելու մաքսային քվոտաներ 2024թ.ին ԵԱՏՄ մսի և կաթնաշիճուկի որոշ տեսակների ներմուծման համար.

«Եվրասիական տնտեսական միության մասին պայմանագրի համաձայն՝ ԵՏՀ-ն սահմանում է մաքսային քվոտաներ երրորդ երկրներում ստեղծված և ԵԱՏՄ մաքսային տարածք ներմուծվող գյուղատնտեսական ապրանքների որոշակի կատեգորիաների համար՝ հաշվի առնելով անդամ երկրներում դրանց սպառման և արտադրության մնացորդները, ինչպես նաև՝ երկրների պարտավորությունները Առևտրի համաշխարհային կազմակերպության նկատմամբ»,- ասել է ԵՏՀ Մաքսային սակագնային և ոչ սակագնային կարգավորման վարչության փոխտնօրեն Նատալյա Սամոյլովան։

Նշվում է, որ, ըստ կանխատեսման, այս տարի՝ 2023թ.ին,  ապրանքների արտադրության և սպառման ծավալների միջև բացասական տարբերություն է սպասվում։ Մասնավորապես, խոշոր եղջերավոր անասունի մսի դեպքում՝ 204,5 հազար տոննա տարբերություն, խոզի մսի դեպքում՝ 60 հազար տոննա, թռչնի մսի դեպքում՝ 210,8 հազար տոննա, իսկ կաթնային շիճուկի դեպքում՝ 10,35 հազ. տոննա։

Օրինակ, Ղազախստանի և Ռուսաստանի համար 2024թ.ին սակագնային քվոտաները սահմանվել են պետությունների՝ ԱՀԿ-ին միանալու մասին արձանագրություններում ամրագրված չափերով։ 

Հայաստանի, Բելառուսի և Ղրղզստանի համար սակագնային քվոտաները որոշվել են սպառման և արտադրության տարբերության շրջանակներում՝ հաշվի առնելով կողմերի պահանջած ծավալները։

Այսպիսով,, խոշոր եղջերավոր անասունների մսի համար քվոտաները կկազմեն 9 հազար տոննա Հայաստանի համար, 21 հազար տոննա Ղազախստանի, 5 հազար տոննա Ղրղզստանի և 570 հազար տոննա Ռուսաստանի համար։ 

Խոզի մսի համար քվոտաները կբաշխվեն հետևյալ ծավալներով՝ 12 հազար տոննա Հայաստանի, 20 հազար տոննա Բելառուսի և 2 հազար տոննա Ղրղզստանի համար։

Մսի և թռչնամսի  ենթամթերքի քվոտաները Հայաստանի համար կկազմեն 39,1 հազար տոննա, Բելառուսի համար՝ 10,9 հազար տոննա, Ղազախստանի համար՝ 140 հազար տոննա, Ղրղզստանի համար՝ 58 հազար տոննա, իսկ Ռուսաստանի համար՝ 364 հազար տոննա: 

Կաթնաշիճուկի ներմուծման քվոտան Հայաստանի  համար կլինի 1,2 հազար տոննա, իսկ Ռուսաստանի համար՝ 15 հազար տոննա։