«Գրեգորիան» գինու գործարանում հայտնաբերվել են սանիտարահիգիենիկ նորմերի խախտումներ
29.10.2025
24 ժամ ջուր չի լինի Կոտայքի մարզի որոշ բնակավայրերում
03.11.2025
● Արամ Սահակյան
Եվրասիական տնտեսական միության (ԵԱՏՄ) շրջանակում կձևավորվի ագրոարդյունաբերական համատեղ նախագծերի ֆինանսական աջակցության նոր մեխանիզմ։ Այս հարցը նաև քննարկվել է վերջերս՝ հոկտեմբերի 22-ին Եվրասիական տնտեսական հանձնաժողովի (ԵՏՀ) Ագրոարդյունաբերական համալիրի հարցերով խորհրդատվական կոմիտեի նիստում։
Արդյունաբերության և ագրոարդյունաբերական համալիրի նախարար Գոհար Բարսեղյանի խոսքով՝ նոր նախաձեռնությունը ԵԱՏՄ անդամ պետությունների համագործակցությունն ուժեղացնող ֆինանսական գործիք է.
«Ագրոարդյունաբերական համալիրի համար սա համատեղ նախագծերին աջակցելու նոր միջոց է, որը խթանում է ԵԱՏՄ անդամ պետությունների կազմակերպությունների փոխշահավետ համագործակցությունը։ Կառավարությունների ղեկավարներն անհրաժեշտ որոշումներ են ընդունել նորմատիվ իրավական բազայի մշակման համար, ուստի ներկայումս Հանձնաժողովը՝ Միությունում իր գործընկերների հետ սկսել է մշակել կոոպերացիոն նախագծերի ընտրության և ԵԱՏՄ բյուջեի միջոցների հաշվին դրանց ֆինանսական աջակցության տրամադրման մասին հիմնադրույթը», — նշել է Գոհար Բարսեղյանը:
Բացի այդ, նիստի մասնակիցները քննարկել են նաև կենսատեխնոլոգիաների կիրառման ոլորտում միջպետական համագործակցության հնարավորությունները։
Գոհար Բարսեղյանը շեշտել է, որ ԵԱՏՄ անդամ պետությունների համատեղ ջանքերի կոնսոլիդացիան կենսատեխնոլոգիաների ոլորտում կարևոր է.
«Կենսատեխնոլոգիաների ոլորտում անդամ պետությունների ջանքերի համախմբումից է կախված մանրէային կենսատեխնոլոգիաների ոլորտում տեխնոլոգիական ինքնիշխանության բարեհաջող պահպանումը», — ընդգծել է ԵՏՀ նախարարը:
Կոմիտեն հավանություն է տվել նաև ԵԱՏՄ անդամ երկրներում կերերի և կերային հավելումների շուկայի վիճակի ու զարգացման հեռանկարների մասին ԵՏՀ-ի պատրաստած զեկույցին։
Նշվում է, որ այն նպատակ ունի բարձրացնել կերարտադրության արդյունավետությունը և մրցունակությունը՝ կիրառելով տեխնոլոգիական նորարարություններ, խթանելով ներքին արտադրությունը և զարգացնելով ենթակառուցվածքները։
Փաստաթուղթն ուղարկվելու է անդամ պետությունների լիազոր մարմիններին արդեն գործնական կիրառման համար:
