Վերջերս մեր «Անվտանգ սնունդ» ֆեսյբուքյան խմբում հրապարակում էինք արել այն մասին, որ «Աշտարակ կաթի»՝ ժամկետի մեջ (14.10.25-23.10.25) գտնվող թթվասերային արտադրանքում բորբոս է եղել։

«Աշտարակ կաթը» (արտադրող՝ «Աշատարակ Միլկ» ՍՊԸ) պարզաբանում է ուղարկել` նշելով, որ իրականացրել է հետազատություն՝ պարզելու արտադրանքի հնարավոր փոփոխության պատճառները, ինչպես նաև՝ հրավիրել է ընկերություն՝ իրենց կողմից իրականացված հետազոտության արդյունքներին ծանոթանալու,  կատարված ուսումնասիրությունների մանրամասները քննարկելու համար։

Պարզաբանումն ամբողջությամբ ներկայացնում ենք ստորև.

.

.

Ընկերությունը, հավատարիմ մնալով «արտադրությունից մինչև սպառումը» սկզբունքին, մշտապես վերահսկում է իր արտադրանքի որակը բոլոր փուլերում։ Սպառման ժամկետի ավարտից հետո ընկերության որակի բաժնի կողմից իրականացվել է հետազոտություն՝ պարզելու նշված արտադրանքի հնարավոր փոփոխությունները։ Սպառման ժամկետի ավարտից հետո արտադրանքի մի մասը պահվել է Ընկերության պահեստում ևս յոթ օր՝ նույն ջերմային պայմաններում։ Վերադարձված նմուշներից միայն երկու տարա էին բաց վիճակում, իսկ մնացած բոլոր տարաները՝ փակ և չվնասված։ Տարաների բացումից հետո կատարվել է արտաքին զննում և լաբորատոր փորձարկում։ 

Արդյունքում՝

• Փակ տարաներից միայն մեկում արձանագրվել են փոփոխության սկզբնական նշաններ 
• Բաց տարաներից մեկում նկատվել է դեղնագորշավուն բորբոս 
• Իսկ մյուս բաց տարայում որևէ շեղում չի արձանագրվել 

Նկատված երևույթները բնորոշ են բնական միկրոֆլորայի փոփոխություններին, որոնք հնարավոր են պահման ժամկետի ավարտից հետո և չեն հանդիսանում արտադրական բնույթի խնդիր։ 

«Աշտարակ Կաթ»–ի արտադրանքը թողարկվում է լաբորատոր վերահսկման պայմաններում՝ օգտագործելով պաստերիզացված հումք, ստերիլ փաթեթավորում և պահպանելով բոլոր սանիտարահիգիենիկ պահանջները։ Այս հիմքով բացառվում է, որ արձանագրված փոփոխությունները կապված լինեն արտադրական կամ տեխնոլոգիական գործընթացների խախտման հետ։ 

Բացի այդ, հրապարակված տեսանյութում ներկայացված նմուշում արձանագրված փոփոխությունները ֆիզիկապես չեն կարող առաջանալ նման կարճ ժամանակահատվածում՝ պահպանման ժամկետի սահմաններում, ուստի դրանք չեն կարող վերաբերել «ԱՇՏԱՐԱԿ ՄԻԱԿ» սահմանափակ պատասխանատվությամբ ընկերության արտադրանքին։

Հետևություն. Տեսանյութում ներկայացված դեպքը չի կարող դիտարկվել որպես արտադրական բնույթի թերություն կամ մեր արտադրանքի որակի ցուցանիշ։ Եթե տեղի ունեցածը լիներ արտադրական խախտման արդյունք, ապա Ձեր կողմից ներկայացված տեսանյութում արձանագրված փոփոխությունները կդիտվեին տվյալ արտադրանքի ամբողջ խմբաքանակում, ոչ թե միայն աոանձին նմուշում։ 

Ընկերությունը շարունակում է գործել հաստատված տեխնոլոգիական կանոնակարգերի և որակի կառավարման միջազգային ստանդարտների (HACCP, ISO) պահանջներին համապատասխան և մշտապես պատրաստ է համագործակցել սպառողների հետ՝ ապահովելով որակի կառավարման գործընթացների լիարժեք թափանցիկություն։