Սննդամթերքի անվտանգության տեսչական մարմնի կողմից «Թամարա» ընկերությանը պատկանող կաթնամթերքի արտադրամասում (Կոտայքի մարզ, ք․ Աբովյան) իրականացված ստուգման արդյունքում պարզվել է, որ արտադրվել է սննդամթերքի անվտանգության ոլորտի իրավական ակտերով սահմանված անվտանգության և սննդամթերքի հիգիենային ներկայացվող պահանջների անհամապատասխանությամբ վտանգավոր սննդամթերք։

Փորձաքննության ներկայացված «Կաթնաշոռ դասական 7%», «Թան չգազավորված» արտադրատեսակների նմուշները՝ «Խմորասնկեր», «Բորբոսասնկեր» ցուցանիշներով, «Վանիլային պաղպաղակ կաթնայուղի փոխարինիչով» արտադրատեսակի նմուշը «Կաթնայուղի զանգվածային մաս» ցուցանիշով, չեն համապատասխանել «Կաթի և կաթնամթերքի անվտանգության մասին» Մաքսային միության տեխնիկական կանոնակարգի պահանջներին:

Տեսչական մարմնի ղեկավարի որոշմամբ՝ կաթնամթերքի արտադրամասի արտադրական գործունեության առանձին գործառույթը՝ «Կաթնաշոռ դասական 7%», «Թան չգազավորված», «Վանիլային պաղպաղակ կաթնայուղի փոխարինիչով» արտադրատեսակների արտադրությունը, կասեցվել է:

Խմորասնկեր և բորբոսասնկեր — միկրոօրգանիզմներ են, որոնց քանակի ավելացումը կարող է վկայել արտադրության, պահպանման կամ տեղափոխման ընթացքում սանիտարահիգիենիկ պահանջների խախտումների մասին։

Կաթնայուղի մասով — պաղպաղակին վերաբերող ՄՄ ՏԿ 033/2013 տեխնիկական կանոնակարգը պահանջում է, որ փոխարինիչը պաղպաղակում չգերազանցի 50%-ը։ Մնացած 50% պետք է լինի կաթնայուղ։

Փորձաքննությամբ պարզվել է, որ այս պահանջը չի պահպանվել։

Սահմանվել է վերջնաժամկետ արձանագրված խախտումները վերացնելու համար: