2026թ. մայիսի 30-ից ժամանակավորապես սահմանափակվելու է Հայաստանից Ռուսաստան թարմ լոլիկի, վարունգի, պղպեղի, կանաչեղենի և ելակի ներմուծումը։ Այս մասին երեկ հայտնել է «Ռոսսելխոզնադզոր»-ը։

Ռուսական գերատեսչության պաշտոնական հաղորդագրության համաձայն՝ սահմանափակումը գործելու է մինչև «արտահանվող արտադրանքի անվտանգության ապահովման համապատասխան մեխանիզմի մշակումը»։

ՌԴ կողմը նշում է, որ որոշումն ընդունվել է հայկական միրգ-բանջարեղենի մատակարարումների ընթացքում արձանագրվող խախտումների հաճախացման և «Ռուսաստանի ֆիտոսանիտարական բարեկեցությունն ապահովելու նպատակով»։

«Ստեղծված իրավիճակը սպառնալիք է ներկայացնում երկրի բուսանիտարական վիճակի համար», — ասվում է «Ռոսսելխոզնադզոր»-ի հաղորդագրության մեջ։

Ռուսական գերատեսչությունը նաև հայտարարել է, որ հայկական իրավասու մարմինների կողմից «նախկինում արձանագրված խախտումների մասով համապատասխան միջոցներ չեն ձեռնարկվել»։

Նշենք, որ մայիսի 21-27-ը «Ռոսսելխոզնադզոր»-ը ստուգումներ է իրականացրել հայկական մի շարք ձեռնարկություններում, որոնց ընթացքում ջերմոցային համալիրներում հայտնաբերվել են ԵԱՏՄ երկրների համար կարանտինային համարվող օբյեկտներ։

Ռուսական կողմի տվյալներով՝ միայն 2026թ.  ընթացքում հայկական միրգ-բանջարեղենի ներմուծման ժամանակ արձանագրվել է նման խախտման 181 դեպք։

Բացի այդ, «Ռոսսելխոզնադզոր»-ը պնդում է, որ հայկական բազմաթիվ արտահանողներ գործում են «անհայտ սեփականության ձևով» և խուսափում են կարանտինային բուսանիտարական վերահսկողությունից, ինչը, ըստ գերատեսչության, վկայում է արտահանվող արտադրանքի հետագծելիության համակարգի բացակայության մասին։

Հիշեցնենք, որ վերջին շաբաթներին Ռուսաստանը սահմանափակումներ և խստացված վերահսկողություն էր կիրառել նաև հայկական հանքային ջրի, ծաղիկների և որոշ ալկոհոլային խմիչքների նկատմամբ։

Մանրամասները կարդացեք մեր նախորդ հրապարակման մեջ՝

• Հայաստանը ռուսական սահմանափակումների ֆոնին․ որ ապրանքներն են հայտնվել արգելքի տակ և ինչու

Сообщение «Խախտումները չեն շտկվել»․ Ռուսաստանը սահմանափակում է հայկական միրգ-բանջարեղենի ներմուծումը появились сначала на anvtangsnund.am.

Եվրասիական տնտեսական հանձնաժողովի խորհուրդը քննարկել է Եվրասիական տնտեսական միության անդամ երկրների առաջարկների փաթեթը և ընդունել մի շարք որոշումներ, որոնք սահմանում են միասնական մակնշման կանոններ մի շարք ապրանքատեսակների համար՝ ներառյալ թեյը, սուրճը, կակաոն, ներկերն ու լաքերը, մանկական խաղալիքները և շինանյութերը։

Նշվում է, որ կանոնների նպատակը ապրանքների վերահսկելիությունն ու հետագծելիությունն ուժեղացնելն է, քանի որ մակնշման միասնական համակարգը թույլ կտա՝

•  հեշտացնել ապրանքի իսկության ստուգումը
• պայքարել կեղծ և ապօրինի շրջանառվող ապրանքների դեմ,
• ապահովել, որ ԵԱՏՄ երկրներում նույն ապրանքի կոդերը փոխադարձաբար ճանաչվեն
• խուսափել ապրանքների վերամակնշումից՝ միության ներսում տեղափոխման ժամանակ

Սա նշանակում է, որ արտադրողները և ներմուծողները նոր ապրանքախմբերի համար պետք է կիրառեն նույնականացման հատուկ կոդեր, իսկ վերահսկող մարմինները կկարողանան հետևել ապրանքի շարժին շուկայում։

Ըստ ստորագրված փաստաթղթերի՝ ԵԱՏՄ անդամ պետությունները ինքնուրույն կորոշեն իրենց տարածքում արտադրանքի մակնշման ներդրման ժամկետներն ու կարգը՝ պարտավորվելով այդ մասին տեղեկացնել ԵՏՀ-ին ոչ ուշ, քան 6 ամիս առաջ՝ համապատասխան միջոցառումների մեկնարկից։

«Մակնշման ենթակա ապրանքատեսակների թվի ընդլայնումը վկայում է Միության միասնական մակնշման համակարգի զարգացման մասին, որը հնարավորություն է տալիս սպառողներին համոզվել արտադրանքի իսկության մեջ, ինչպես նաև բարձրացնում է շուկայի բարեխիղճ մասնակիցների մրցունակությունը՝ նվազեցնելով անօրինական շրջանառությունը»,-նշել է Եվրասիական տնտեսական հանձնաժողովի առևտրի հարցերով նախարար Անդրեյ Սլեպնևը։

Նա նաև ընդգծել է, որ նոր խմբերի մակնշումը կիրականացվի միասնական կանոններով՝ համաձայն ԵԱՏՄ-ում 2019 թվականին ԵՏՀ խորհրդի որոշմամբ հաստատված մակնշման համակարգի տեխնոլոգիական կազմակերպչական հիմնական մոդելի։

Ըստ նրա՝ սա կերաշխավորի կոդերի փոխադարձ ճանաչում և կվերացնի ապրանքների վերամակնշման անհրաժեշտությունը Միության տարածքում շրջանառության ընթացքում։

Сообщение Մակնշման նոր կանոններ թեյի, սուրճի, խաղալիքների և այլ ապրանքների համար появились сначала на anvtangsnund.am.

● Աննա Սարգսյան

Երեկ՝ ապրիլի 28-ին, Ռուսաստանի «Ռոսպոտրեբնադզորը» (Ռուսաստանի սպառողների իրավունքների պաշտպանության և մարդու բարեկեցության վերահսկողության դաշնային ծառայություն, հեղ.) հայտարարել է, որ ժամանակավորապես դադարեցնում է «Ջերմուկ» հանքային բնական բուժիչ-սեղանի խմելու գազավորված ջրի ներմուծումն ու շրջանառությունը Ռուսաստանի Դաշնության տարածքում։

Գերատեսչության տվյալներով՝ ջրի որոշ խմբաքանակներում հայտնաբերվել է հիդրոկարբոնատի իոնների, քլորիդների և սուլֆատների չափազանց մեծ քանակություն։

«2026 թվականի ապրիլի 28-ից Ռոսպոտրեբնադզորը սահմանել է ժամանակավոր սանիտարական միջոց՝ Ռուսաստանի Դաշնության տարածքում «Ջերմուկ» բնական հանքային բուժիչ-սեղանի խմելու գազավորված ջրի ներմուծման և շրջանառության դադարեցման վերաբերյալ՝ հետևյալ արտադրության ամսաթվերով՝ 17.02.2026, 05.03.2026, 13.03.2026, 12.01.2026, 18.11.2025, 19.02.2026, 24.11.2025, 27.03.2026, 10.01.2026, 22.11.2025, 23.10.2025», — նշված է գերատեսչության հաղորդագրության մեջ։

«Ռոսպոտրեբնադզորը» նաև ընդգծել է, որ նշված արտադրանքը «չի համապատասխանում մակնշման մեջ նշված տեղեկատվությանը», ինչը խախտում է ՄՄ 044/2017 տեխնիկական կանոնակարգի 3-րդ բաժնի 10-րդ կետի պահանջները՝ «Փաթեթավորված խմելու ջրի, ներառյալ բնական հանքային ջրի, անվտանգության մասին»։

«Ջրում հայտնաբերվել է հիդրոկարբոնատի իոնների, քլորիդների և սուլֆատների չափազանց մեծ քանակություն։ Արտադրանքի բուժական հատկությունների մասին մոլորեցնող տեղեկատվությունը կարող է հանգեցնել անարդյունավետ բուժման և առողջության վատթարացման», — հատված «Ռոսպոտրեբնադզորի» հայտարարությունից։

Բացի այդ, մարդկանց առողջությանը հնարավոր վնաս հասցնելու ռիսկը կանխելու նպատակով «Ռոսպոտրեբնադզորը» տեղեկատվություն է փոխանցել «Օպերատոր-ЦРПТ» ընկերությանը՝ որպեսզի Ռուսաստանի տարածք ներմուծված «Ջերմուկ» հանքային ջրի վաճառքը ժամանակավորապես կասեցվի պետական մոնիթորինգի համակարգի միջոցով, որը վերահսկում է պարտադիր մակնշմամբ ապրանքների շրջանառությունը։

Հիդրոկարբոնատները, քլորիդները և սուլֆատները հանքային ջրի բնական բաղադրիչներ են, սակայն դրանց չափազանց բարձր կոնցենտրացիան կարող է վկայել ջրի քիմիական կազմի շեղման մասին։

Նման շեղումները որոշ դեպքերում կարող են ազդել ջրի բուժիչ հատկությունների վրա և առողջության համար ստեղծել հնարավոր ռիսկեր՝ հատկապես երկարատև օգտագործման դեպքում։

Նշենք, որ երեկ ՀՀ Սննդամթերքի անվտանգության տեսչական մարմինը հայտնել էր, որ ՌԴ համապատասխան պատկան մարմիններից՝ «Ռոսպոտրեբնադզոր»-ից կամ «Ռոսսելխոզնադզորից» (ՌԴ անասնաբուժական և բուսասանիտարական վերահսկողության դաշնային ծառայություն), պաշտոնական որևէ տեղեկություն՝ գրություն, «խնդրո առարկայի վերաբերյալ առայժմ չի ստացել». 

«Ձեռնարկվում են միջոցներ իրավիճակը պարզաբանելու և համապատասխան քայլեր ձեռնարկելու ուղղությամբ: Արդյունքները կհրապարակվեն»,-նշել էր ՍԱՏՄ-ն։

Сообщение Ռուսաստանը ժամանակավորապես դադարեցրել է «Ջերմուկի» ներմուծումն ու շրջանառությունը появились сначала на anvtangsnund.am.

Սոցիալական նշանակություն ունեցող որոշ բանջարեղենների ներմուծման համար միջսեզոնային շրջանում կգործի մաքսատուրքի ժամանակավոր արտոնություն։ Այդ մասին որոշում է ընդունել Եվրասիական տնտեսական հանձնաժողով-ի խորհուրդը։

Որոշմամբ նախատեսվում է ներմուծման մաքսատուրքից ազատել մանրածախ առևտրի համար նախատեսված մի շարք բանջարեղեններ։

Հայաստանի դեպքում որոշմամբ նախատեսված է միայն մեկ ապրանքատեսակ՝ սոխի ներմուծում՝ մինչև 5 հազար տոննա ծավալով։

Ընդհանուր առմամբ՝ ներմուծման արտոնությունների ամենամեծ ծավալը նախատեսված է Ղազախստանի համար․ այստեղ նախատեսվում է միաժամանակ մի քանի բանջարեղենի մատակարարում՝ կարտոֆիլ, սոխ, սպիտակ կաղամբ և գազար։ Տեսակների առավել մեծ բազմազանություն նախատեսված է Ղրղզստանի համար, որտեղ արտոնությունը վերաբերում է մի քանի ապրանքատեսակի՝ կարտոֆիլ, ծաղկակաղամբ և բրոկոլի, վարունգ, սմբուկ, քաղցր պղպեղ և լոլիկ։

Մասնավորապես, նախատեսվում է կարտոֆիլի մատակարարում՝ մինչև 100 հազար տոննա Ղազախստան և մինչև 50 հազար տոննա՝ Ղրղզստան։

Բացի այդ, նախատեսվում է սոխի մատակարարում մինչև 100 հազար տոննա՝ Ղազախստան։

Տարեկան արտոնությունը վերաբերում է նաև հետևյալ բանջարեղեններին․

• ծաղկակաղամբ և բրոկոլի՝ մինչև 600 տոննա Բելառուս և մինչև 500 տոննա՝ Ղրղզստան,
• սպիտակ կաղամբ՝ մինչև 35 հազար տոննա Ղազախստան,
• գազար՝ մինչև 30 հազար տոննա Ղազախստան,
• վարունգ՝ մինչև 400 տոննա Ղրղզստան,
• սմբուկ՝ մինչև 200 տոննա Բելառուս, մինչև 200 տոննա Ղրղզստան և մինչև 6,6 հազար տոննա՝ Ռուսաստան,
• քաղցր պղպեղ՝ մինչև 5,2 հազար տոննա Բելառուս, մինչև 2 հազար տոննա Ղրղզստան և մինչև 27 հազար տոննա՝ Ռուսաստան։

«Ավանդաբար միջսեզոնային շրջանում բանջարեղենի շուկայում նկատվում են սպառողական գների զգալի տատանումներ, ինչը առաջին հերթին պայմանավորված է տեղական արտադրության ապրանքների պաշարների ավարտով։ Ընդունված միջոցը թույլ կտա ապահովել ներքին շուկայում լրացուցիչ առաջարկ և բարձրացնել բանջարեղենի հասանելիությունը բնակչության համար»,-նշել է Եվրասիական տնտեսական հանձնաժողովի առևտրի հարցերով նախարար Անդրեյ Սլեպնևը։

Արտոնությունը կգործի մինչև 2026 թվականի հունիսի 30-ը։

Բացի այդ, մինչև 2026թ. մայիսի 31-ը կգործի նաև մաքսատուրքի արտոնություն՝ մինչև 5 հազար տոննա լոլիկի ներմուծման համար դեպի Ղրղզստան։

Որոշումն ուժի մեջ կմտնի պաշտոնական հրապարակումից 10 օր անց։

Сообщение Հայաստանն առանց մաքսատուրքի սոխ կներմուծի появились сначала на anvtangsnund.am.

Եվրասիական տնտեսական հանձնաժողովի (ԵՏՀ) խորհուրդը որոշում է ընդունել՝ ըստ որի մի շարք երկրների, այդ թվում՝ Հայաստանը կազատվեն մաքսատուրքից կակաոյի հատիկների վերամշակման միջանկյալ արտադրանքների ներմուծման ժամանակ։

Խոսքը, մասնավորապես, վերաբերում է չյուղազրկված կակաոյի մածուկին, կակաոյի յուղին և կակաոյի ճարպին (ԵԱՏՄ ԱՏԳ ԱԱ 1803 10 000 0 և 1804 00 000 0 կոդեր)։

Ըստ որոշման՝ Հայաստանը կարող է ներմուծել առավելագույնը 300 տոննա կակաոյի մածուկ և 200 տոննա կակաոյի յուղ կամ ճարպ՝ առանց մաքսատուրքի։

Միաժամանակ, սահմանվել են նաև ներմուծման առավելագույն ծավալներ մյուս երկրների համար․

• Բելառուս – մինչև 5,5 հազար տոննա կակաոյի մածուկ և 3,5 հազար տոննա կակաոյի յուղ,

• Ղրղզստան – մինչև 300 տոննա (միայն կակաոյի ճարպ),

• Ռուսաստան – մինչև 37 հազար տոննա՝ նշված երկու արտադրատեսակների ընդհանուր ծավալով։

Մաքսատուրքից ազատման այս միջոցառումը գործելու է մինչև 2027 թվականի ապրիլի 30-ը ներառյալ։

«Նշված արտադրանքը օգտագործվում է հրուշակեղենի արտադրողների կողմից՝ շոկոլադի, շոկոլադե կոնֆետների և շոկոլադե այլ արտադրատեսակների պատրաստման համար, ինչպես նաև կիրառվում է դեղագործական և օծանելիքի արդյունաբերությունում», – նշել է ԵՏՀ առևտրի նախարար Անդրեյ Սլեպնևը։

Նրա խոսքով՝ «սակագնային արտոնության կիրառումը թույլ կտա ապահովել կազմակերպությունների աշխատանքի արդյունավետությունը՝ հումքի արժեքի նվազեցման հաշվին»։

Նախարարն ընդգծել է նաև, որ ներկայումս հրուշակեղենի ոլորտի ձեռնարկություններից մեկը իրականացնում է ներդրումային նախագիծ՝ կակաոյի հատիկների ամբողջական ցիկլով վերամշակման հզորությունների մեծացման նպատակով։ Սակայն այդ նախագիծը նախատեսվում է ավարտել միայն 2029 թվականին։

Միևնույն ժամանակ նշվում է, որ մաքսային արտոնությամբ ներմուծվող հումքը կարող է օգտագործվել միայն Հայաստանի կամ Բելառուսի տարածքում։

Որոշումը ուժի մեջ կմտնի պաշտոնական հրապարակումից տասը օր անց։

Հիշեցնենք, որ վերջերս Հայաստանը ներմուծման արտոնությունն էր ստացել նաև շաքարեղեգի հումքի մասով։

Сообщение Հայաստանն առանց մաքսատուրքի կակաոյի հումք կներմուծի появились сначала на anvtangsnund.am.

Եվրասիական տնտեսական հանձնաժողովի խորհուրդը Հայաստանին, ինչպես նաև՝ Ղազախստանին և Ղրղզստանին, 2026թ. համար տվել է մաքսատուրքից ազատման արտոնություն՝ արդյունաբերական վերամշակման համար նախատեսված եղեգնաշաքարի հումքի ներմուծման համար։

Սահմանված քվոտայի համաձայն՝

• Հայաստան կարող է ներմուծվել ոչ ավելի, քան 20 հազար տոննա եղեգնաշաքարի հումք,

• Ղազախստան՝ մինչև 100 հազար տոննա,

• Ղրղզստան՝ մինչև 20 հազար տոննա։

Արտոնությունը գործելու է ամբողջ 2026 թվականի ընթացքում։

«Այս որոշումը կայացվել է Հայաստանի, Ղազախստանի և Ղրղզստանի ներքին շուկաներում մրցակցային գներով շաքարի և շաքար պարունակող արտադրանքի կայուն մատակարարումն ապահովելու, այդ ապրանքների պակասը կանխելու և շաքարի վերամշակման գործարաններում աշխատուժը պահպանելու համար», — նշել է ԵՏՀ առևտրի նախարար Անդրեյ Սլեպնևը։

Միևնույն ժամանակ, ընդգծվել է, որ ներմուծված եղեգնաշաքարի հումքի արդյունաբերական վերամշակման արդյունքում ստացված սպիտակ շաքարը չի կարող արտահանվել Եվրասիական տնտեսական միության այլ անդամ երկրներ։

Сообщение Հայաստանը շաքարեղեգի հումք կներմուծի առանց մաքսատուրքի появились сначала на anvtangsnund.am.

Եվրասիական տնտեսական հանձնաժողովի խորհուրդը փոփոխել է ԵԱՏՄ մաքսային տարածք ներմուծվող և պարտադիր համապատասխանության գնահատման ենթակա ապրանքների կարգը։

Փոփոխությունները վերաբերում են հատկապես «բոնդային» պահեստներով ներմուծվող էլեկտրոնային առևտրի ապրանքներին և որոշակի սահմանափակումներ են նախատեսում անվավոր տրանսպորտային միջոցների համար։

Նյութում կարդացեք՝ 

• ինչ է փոխվելու ներմուծման կարգում,

• որ երկրներում ինչ սահմանափակումներ են գործելու,

• երբ են փոփոխություններն ուժի մեջ մտնելու,

• և ինչ առանձնահատկություններ կան ավտոմեքենաների մասով

։

Ինչ է փոխվել ներմուծման կարգում

Եվրասիական տնտեսական հանձնաժողովի խորհուրդը հաստատել է փոփոխություններ, որոնք վերաբերում են ԵԱՏՄ մաքսային տարածք ներմուծվող և պարտադիր համապատասխանության գնահատման ենթակա արտադրանքին։

Խոսքն այն ապրանքների մասին է, որոնք ներմուծվում են ԵԱՏՄ մաքսային տարածք և պետք է անցնեն տեխնիկական կարգավորման պահանջների համապատասխանության գնահատում։

Փաստաթղթով սահմանվել է, թե ինչպես պետք է հաստատվի տեխնիկական կարգավորման միջոցների պահպանումն այն ապրանքների համար, որոնք ներմուծվում են էլեկտրոնային առևտրի օպերատորների «բոնդային» պահեստների միջոցով։ 

«Բոնդային» պահեստը մաքսային հատուկ ռեժիմով գործող պահեստ է, որտեղ ներմուծված ապրանքները կարող են ժամանակավորապես պահվել՝ առանց մաքսատուրքերի և հարկերի վճարման մինչև դրանք ձևակերպվեն և շրջանառության մեջ դրվեն։

Էլեկտրոնային առևտրի դեպքում նման պահեստները, սովորաբար, օգտագործվում են օնլայն հարթակների միջոցով վաճառվող ապրանքների համար․ ապրանքը, նախ, ներմուծվում է պահեստ, ապա, պատվերի հիման վրա ձևակերպվում և հանձնվում գնորդին։

Այս ձևաչափը թույլ է տալիս արագացնել առաքումներն ու պարզեցնել լոգիստիկան, սակայն միաժամանակ պահանջում է հստակ վերահսկողություն՝ տեխնիկական կարգավորման պահանջների պահպանման մասով։

։

Առանձնահատկություններ ավտոմեքենաների համար

Փոփոխություններով հատուկ կարգ է սահմանվել «բոնդային» պահեստներով ներմուծվող անիվավոր տրանսպորտային միջոցների (շասսիների) համար։

Այդպիսի տրանսպորտային միջոցները կարող են առանց սահմանափակումների ներմուծվել և շրջանառության մեջ դրվել միայն երեք երկրում՝

• Հայաստան,

• Բելառուս,

• Ղրղզստան։

Մինչդեռ

• Ղազախստանում և

• Ռուսաստանում

այդ տրանսպորտային միջոցները կարող են օգտագործվել միայն բեռնափոխադրումների և ուղևորափոխադրումների նպատակով, ինչպես նաև ՝այլ անդամ պետությունների ֆիզիկական անձանց կողմից (մասնավոր ուղևորությունների և նմանատիպ նպատակներով), եթե տվյալ տրանսպորտային միջոցը գրանցված է այդ երկրում։

։

Երբ են փոփոխություններն ուժի մեջ մտնելու

Ներմուծման կարգում կատարված փոփոխություններն էլեկտրոնային առևտրի ապրանքների մասով կկիրառվեն այն պահից, երբ ուժի մեջ մտնի 2023թ դեկտեմբերի 25-ին ստորագրված արձանագրությունը, որով փոփոխություններ են կատարվել 2017թ. ապրիլի 11-ի ԵԱՏՄ Մաքսային օրենսգրքի մասին պայմանագրում։

Նախնական գնահատմամբ՝ դա կարող է տեղի ունենալ մինչև 2026 թվականի հուլիսի 1-ը։

Բացի այդ, 2026թ. մարտի 13-ից ուժի մեջ կմտնի առանձին դրույթ, ըստ որի՝ արգելում է Ղազախստանի տարածքում շրջանառության մեջ դնել անիվավոր տրանսպորտային միջոցներ (շասսի), որոնց մաքսային հայտարարագրման ժամանակ մաքսային մարմիններին տրամադրվել են տրանսպորտային միջոցների տեսակի հաստատումների (շասսիի տեսակի հաստատումների) պատճեններ՝

Միևնույն ժամանակ, այդ սահմանափակումը չի տարածվի այն դեպքերի վրա, երբ նման տրանսպորտային միջոցները օգտագործվում են Ղազախստանում բեռնափոխադրումների և ուղևորափոխադրումների նպատակով, ինչպես նաև՝ ԵԱՏՄ այլ անդամ պետությունների ֆիզիկական անձանց կողմից՝ մասնավոր նպատակներով, եթե դրանք գրանցված են համապատասխան երկրում։

։

Ինչ է սա նշանակում գործնականում

Փոփոխությունները հստակեցնում են, թե ինչպես պետք է վերահսկվի տեխնիկական կարգավորման պահանջների պահպանումը էլեկտրոնային առևտրի միջոցով ներմուծվող ապրանքների դեպքում։

Միաժամանակ, ավտոմեքենաների ներմուծման հարցում սահմանվում է տարբերակված մոտեցում՝ կախված ԵԱՏՄ անդամ պետությունից։

Այսպիսով, նոր կարգավորումները մի կողմից միասնականացնում են ընթացակարգերը ամբողջ միության տարածքում, մյուս կողմից՝ որոշ ոլորտներում պահպանում ազգային առանձնահատկություններ։

Сообщение Ավտոմեքենաների ներմուծման նոր կանոններ ԵԱՏՄ-ում․ ինչ է փոխվում Հայաստանի համար появились сначала на anvtangsnund.am.

Եվրասիական տնտեսական միության (ԵԱՏՄ) երկրներում հունվարի 22-ից ուժի մեջ են մտել փոփոխություններ, որոնք վերաբերում են պետական գնումների նպատակով որոշ ապրանքների ծագման երկրի սահմանման կանոններին։ 

Մասնավորապես, փոփոխություններ են կատարվել պետական գնումների համար նախատեսված որոշ դեղագործական և բժշկական արտադրանքների նկատմամբ գործող կանոններում։

Ընդունված փոփոխությունները տարածվելու են 2026թ. հունվարի 1-ից ծագած իրավահարաբերությունների նկատմամբ։

Ըստ փոփոխությունների՝ հնարավոր կլինի Եվրասիական արդյունաբերական ապրանքների ռեեստրում ընդգրկել 56 ապրանքային անվանում։ Դրանցից 31 ապրանք, այդ թվում՝ սինթետիկ մանրաթելեր, բժշկական ասեղներ, պրոթեզներ, ուրոստոմիկ պարկեր, ուլտրաձայնային սարքեր, դեղեր և դեղագործական սուբստանցիաներ, կներառվեն ռեեստրում՝ արտադրական պայմանների և տեխնոլոգիական գործողությունների որոշակի ցանկի կատարումն ապահովելու դեպքում։

Մնացած 25 ապրանքները, որոնց թվում են՝ բժշկական դիմակներ, վիրակապեր, ներարկիչներ, վիրաբուժական նյութեր, լսողական սարքեր և կրակմարիչներ, ռեեստրում կներառվեն СТ-1 ձևի սերտիֆիկատի ներկայացման հիման վրա։

Բացի այդ, մինչև 2026թ. վերջը երկարաձգվել է կանոնների հավելված N 11-ի գործողությունը, որը սահմանում է այն ապրանքների ցանկը, որոնք Եվրասիական արդյունաբերական ռեեստրում ընդգրկվում են СТ-1 սերտիֆիկատի հիման վրա։

Միաժամանակ, որոշ արտադրատեսակների համար այդ ժամկետը երկարաձգվում է միայն մինչև 2026թ. հունիսի 30-ը։

Նշվում է, որ Եվրասիական արդյունաբերական ապրանքների ռեեստրի վարումը նպատակ ունի ապահովել ԵԱՏՄ երկրների պետական գնումներին հասանելիությունը՝ այն պայմաններում, երբ գործում են արտոնություններ, սահմանափակումներ կամ արգելքներ այլ անդամ պետությունների կամ երրորդ երկրների արտադրանքի նկատմամբ։

Ռեեստրում ընդգրկվելու համար արտադրողները պետք է առաջնորդվեն սահմանված հստակ ալգորիթմով։

Сообщение Դեղեր, բժշկական սարքեր, դիմակներ․ ինչ է փոխվում ԵԱՏՄ պետգնումների կանոններում появились сначала на anvtangsnund.am.

2026թ. հունվարի 22-ից Հայաստանը, Բելառուսն ու Ղրղզստանը կստանան մաքսային արտոնություն էլեկտրական տրանսպորտային միջոցների ներմուծման համար։

Մասնավորապես, ուժի մեջ է մտնելու Եվրասիական տնտեսական հանձնաժողովի խորհրդի 2025թ. դեկտեմբերի 5-ի N 111 որոշումը, որով այս երեք երկրները  էլէկտրոմոբիլներ ներմուծման ժամանակ կազատվեն մաքսատուրքից։

Արտոնությունը տարածվում է՝

• մաքուր էլեկտրամոբիլների (ԵԱՏՄ ԱՏԳ ԱԱ կոդ՝ 8703 80 000 3),

• «հետևողական հիբրիդների» (sequential / series hybrid) վրա (ԵԱՏՄ ԱՏԳ ԱԱ կոդ՝ 8703 80 000 5)։

Ներմուծումը կատարվում է սահմանված քվոտաների շրջանակում։ Հայաստանի և Ղրղզստանի համար նախատեսված է մինչև 15 000 հատ մեքենա ամեն երկրին, Բելառուսի համար՝ 20 000 հատ մաքուր էլեկտրամոբիլների համար։

Նշենք, որ քվոտայի շրջանակում ներմուծվող տրանսպորտային միջոցները կազատվեն ներմուծման մաքսատուրքից միայն այն պայմանով, որ դրանք օգտագործվեն և հաշվառվեն տվյալ երկրի տարածքում։

Հունվարի 22-ից ուժի մեջ կմտնեն Հանձնաժողովի ակտերը, որոնք փոփոխություններ են մտցնում Եվրասիական տնտեսական միության որոշակի տեսակի տրանսպորտային միջոցների համար նախատեսված Տրանսպորտային միջոցների կանոնակարգում (ԵՏՀ խորհրդի 2025թ. դեկտեմբերի 23-ի N 110 որոշում և ԵՏՀ խորհրդի 2025թ. սեպտեմբերի 23-ի թիվ 81 որոշում):

Сообщение Զրոյական մաքսատուրք Հայաստան ներմուծվող էլեկտրամոբիլների համար. ԵԱՏՄ որոշումը появились сначала на anvtangsnund.am.

Եվրասիական տնտեսական միության (ԵԱՏՄ) անդամ պետությունները դեկտեմբերի 29-ին ստորագրել են արձանագրություն, որով փոփոխություններ են կատարվում բժշկական արտադրանքների (բժշկական նշանակության արտադրանք և բժշկական տեխնիկա) շրջանառության միասնական սկզբունքների և կանոնների վերաբերյալ համաձայնագրում։

Ըստ այդ փոփոխությունների՝ ազգային կանոններով բժշկական արտադրանքների գրանցման անցումային շրջանը երկարաձգվում է մինչև 2028թ.։

Արձանագրության համաձայն՝ մինչև 2027թ. դեկտեմբերի 31-ը հնարավոր կլինի բժշկական արտադրանքների փորձաքննության և գրանցման հայտեր ներկայացնել՝

• ինչպես ԵԱՏՄ իրավական նորմերի,

• այնպես էլ՝ անդամ պետության ազգային օրենսդրության համաձայն։

Մինչ այս փոփոխությունը նման հնարավորություն նախատեսված էր միայն մինչև 2025թ. դեկտեմբերի 31-ը, իսկ նախատեսվում էր, որ 2026թ. հունվարի 1-ից բժշկական արտադրանքների գրանցումը կիրականացվի բացառապես ԵԱՏՄ միասնական կանոններով։

Փաստաթղթի ընդունմամբ՝ ԵԱՏՄ երկրները լրացուցիչ ժամանակ են ստանում ազգային գրանցման համակարգերը հարմարեցնելու և փուլային կերպով բժշկական արտադրանքների միասնական գրանցման համակարգին անցնելու համար։

Փոփոխություններն ուժի մեջ կմտնեն 2026թ. հունվարի 8-ից՝ ստորագրման օրվանից հետո 10 օրացուցային օրվա ավարտից հետո։ Փաստաթուղթը ամբողջությամբ ուժի մեջ կմտնի այն պահից, երբ Եվրասիական տնտեսական հանձնաժողովը ստանա ԵԱՏՄ բոլոր անդամ պետությունների կողմից անհրաժեշտ ներպետական ընթացակարգերի ավարտի մասին վերջին գրավոր ծանուցումը։

Сообщение Մինչև 2028թ. ԵԱՏՄ-ում բժշկական արտադրանքները կգրանցվեն ազգային օրենսդրությամբ появились сначала на anvtangsnund.am.